ფართომასშტაბიანი სპეცოპერაციის უცნობი დეტალები – რეალური ბრძოლა კრიმინალებთან თუ დიდი შეთქმულება საქართველოს წინააღმდეგ? – ამის შესახებ იქნება დღეს საუბარი ტელეკომპანია „იბერიას“ გადაცემაში – „ინტერვიუ ვანიჩკასთან“.
„ჩემი რესპონდენტი საქართველოს უახლესი ისტორიის ერთ-ერთი ყველაზე სკანდალური საქმის ფიგურანტია, რომელიც იმის შესახებ ისაუბრებს, რაც არასოდეს უთქვამს,“ – აცხადებს გადაცემის ავტორი და პროდიუსერი ვანო პავლიაშვილი.
მართალია, რესპონდენტის ვინაობა, ტრადიციულად, არც ამჯერად კონკრეტდება, მაგრამ პავლიაშვილის თქმით, დაუმონტაჟებელ ინტერვიუში, რომელსაც მაყურებელი დღეს, 21:30 საათზე, ტელეკომპანია „იბერიას“ ეთერში ნახავს, ბევრი უცნობი ფაქტის შესახებაა საუბარი. ასე, მაგალითად, გადაცემის სტუმარი „მოდულ“-ში გამართულ შეხვედრებს გაიხსენებს და იმასაც იტყვის, თუ რა მისცა ციხემ.
შეგახსენებთ: დაუმონტაჟებელი ინტერვიუების ციკლი – „ინტერვიუ ვანიჩკასთან“ ტელეკომპანია „იბერიას“ ახალი პროექტია, რომელიც ეთერში ყოველ ოთხშაბათს, 21:30 საათზე გადის. ამ ეტაპზე გადაცემის სტუმარი უკვე არაერთი ცნობილი ადამიანი იყო, მათ შორის, საინფორმაციო-სადაზვერვო სამსახურის ყოფილი უფროსი ირაკლი ბათიაშვილი; ფრაქცია „საქართველოს პატრიოტების“ თავმჯდომარე გიორგი ლომია, საქართველოს პირველი პრეზიდენტის, ზვიად გამსახურდიას უფროსი ვაჟი კონსტანტინე გამსახურდია, შს ყოფილი მინისტრი, ამჟამად დეპუტატი კობა ნარჩემაშვილი, სამცხე-ჯავახეთის ყოფილი გუბერნატორი გიგლა ბარამიძე და თავდაცვის ყოფილი მინისტრის, ირაკლი ალასანიას მეუღლე, ფსიქოლოგი ნათია ფანჯიკიძე.