საქართველოში შემოსულ ორ ჩინელ მოგზაურზე დაკვირვება ხორციელდება, – ამის შესახებ დაავადებათა კონტროლის ცენტრის ხელმძღვანელმა, ამირან გამყრელიძემ განაცხადა.
მისი თქმით, აღნიშნული პირები ჩინეთის ერთ-ერთი პროვინციიდან არიან. ისინი ამ ეტაპზე, ბათუმში იმყოფებიან.
„მათ 37 გრადუსი აქვთ ტემპერატურა. ისინი არიან ჩინეთის ერთ-ერთი პროვინციიდან, არა იმ პროვინციიდან, რომელშიც გავრცელებულია, თუმცა მასთან ახლომდებარე. ამიტომ მიმდინარეობს დაკვირვება. გუშინ ისინი ჩვენმა საგანგებო დეპარტამენტის სპეციალისტებმა მოინახულეს. დღეს დილას ანალიზები აუღეს, რომელიც ლუგარის ლაბორატორიაში დაიტესტება ყველა ტიპის კორონავირუსზე, რისი საშუალებაც გვაქვს და ასევე, სხვა რესპირატორულ ვირუსებზე, მაგრამ კლინიკურად გამოხატული არაფერი არ არის“, – განაცხადა გამყრელიძემ და აღნიშნა, რომ ეს პირები საქართველოში მოგზაურობის მიზნით იმყოფებიან.
ამასთან, ამ ეტაპზე არ კონკრეტდება, როდის შემოვიდნენ აღნიშნული პირები საქართველოში.
