სააღმზრდელო პროცესი თბილისის კიდევ ერთ საბავშვო ბაგა-ბაღში შეწყდა – 64-ეში.
შენობის ავარიულობაზე ექსპერტიზის ბიურომ თბილისის საბავშვო ბაგა-ბაღების სააგენტოს ზეპირსიტყვიერად აცნობა. დასკვნის მომზადებას 5 დღე დასჭირდება, მანამდეც ბაღის ფუნქციონირება დაუშვებელია.
გუშინ ფუნქციონირება შეწყვიტა მე-19, 84-ე, 125-ე ბაღებმა. გადაწყვეტილება ექსპერტიზის დასკვნას ეფუძნება, რომლის თანახმად, შენობების მდგომარეობა არადამაკმაყოფილებელია, ექსპლუატაცია მიზანშეწონილი არ არის, შენობებს გამაგრება-გაძლიერებითი და სხვა თანმდევი სამუშაოები უნდა ჩაუტარდეს.
სააგენტომ დაიწყო მონიტორინგი, მოითხოვა შენობების კონსტრუქციული მდგრადობის შესწავლა, ბოლო 4 წლის მანძილზე აშენებული ბაღების გამოკლებით.
შენობები ლევან სამხარაულის სახელობის ექსპერტიზის ეროვნული ბიუროს ექსპერტებმა შეისწავლეს.
აღსაზრდელები სხვა ბაღებში გადანაწილდებიან. დაიწყება შენობების სარეკონსტრუქციო სამუშაოები.