უკრაინელი სამხედროების მიერ გათავისუფლებულ ქალაქ ლიმანში მასობრივ სასაფლაოზე ბავშვების ცხედრებიც აღმოაჩინეს. ამის შესახებ ინფორმაციას „ბიბისის“ რუსულენოვანი სამსახური ავრცელებს.
უკრაინის ეროვნული პოლიციის ცნობით, ლიმანში მასობრივი სასაფლაოების შესახებ ინფორმაცია მათ ადგილობრივმა მოსახლეობამ მიაწოდა.
მათივე ცნობით, ერთ-ერთ სასაფლაოზე სავარაუდოდ 200 სამოქალაქო პირია დაკრძალული, მათ შორის არიან ბავშვებიც. მეორე სასაფლაოზე კი საერთო სამარხია მოწყობილი უკრაინელი სამხედროებისთვის.
თვითმხილველის თქმით, მან აღნიშნულ სასაფლაოზე 20 უკრაინელი მებრძოლი დაკრძალა. დაღუპულებს შორის არიან ერთი ოჯახის წევრები, მათ შორის ორი მცირეწლოვანი ბავშვი.
უკრაინელმა სამხედროებმა დონეცკის ოლქში მდებარე ქალაქი ლიმანი სექტემბერში გაათავისუფლეს.
