თავდაცვის მინისტრ, ლევან იზორიას თქმით, სამხედრო სწავლების დროს დაკარგული ორი ჯარისკაცის ოჯახი სახელმწიფოსგან დახმარებას მიიღებს.
“რადიო თავისუფლებასთან” ინტერვიუში, იზორიამ განაცხადა, რომ თავდაცვის სამინისტრო და ზოგადად, ხელისუფლება დაღუპულების ოჯახებს მაქსიმალურად უდგანან გვერდით.
“მაქსიმალურად გვერდში ვუდგავართ ოჯახებს. არ მინდა დეტალებზე საუბარი, თუმცა ის დახმარება, რაც ეკუთვნით, ოჯახმა მიიღო და კანონით გათვალისწინებულ დახმარებასაც მიიღებს მომავალში”, – განაცხადა იზორიამ.
შეგახსენებთ, შავ ზღვაში ორი სამხედრო 16 აგვისტოს, გეგმიური სწავლების დროს დაიკარგა. დაკარგულად ითვლებიან კაპრალი იაგო შარაძე და პირველი კლასის რიგითი გიორგი ნანეტაშვილი. მომხდარზე მიმდინარეობს გამოძიება.
