ვეტერანების საქმეთა სახელმწიფო სამსახურის დირექტორი კობა კობალაძე აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელს ვახტანგ ყოლბაიას შეხვდა.
ვეტერანების საქმეთა სახელმწიფო სამსახურის ინფორმაციით, შეხვედრა გაცნობითი ხასიათის იყო, სადაც ისაუბრეს სტრუქტურებს შორის თანამშრომლობის გაღრმავებაზე, არსებულ მემორანდუმში დამატებით პუნქტებისა და მასში ცვლილებების შეტანის შესახებ.
აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ აფხაზეთის მთავრობის დაქვემდებარებაში მყოფი ვეტერანთა პრობლემებზე მომუშავე სტრუქტურის შექმნის შესახებ ისაუბრა.
შეხვედრაზე დაიგეგმა ვეტერანებთან მიმართებაში ქმედითი პროგრამების შემუშავება, რაც ხელს შეუწყობს მათი სოციალურ-ეკონომიკური მდგომარეობის გაუმჯობესებას.
სამუშაო შეხვედრაზე აფხაზეთის ავტონომიური რესპუბლიკის მთავრობის წევრები, ვეტერანების საქმეთა სახელმწიფო სამსახურის თანამშრომლები და აფხაზეთიდან დევნილი ვეტერანები იმყოფებოდნენ.
