შინაგან საქმეთა სამინისტროში გიორგი შაქარაშვილის მკვლელობის საქმეზე ერთ-ერთი მოწმის გამოკითხვა გვიანობამდე მიმდინარეობდა. გამოიკითხა პირი, რომელიც 19 ივნისის ღამეს ავტობანზე, “ტოიოტას” მარკის მანქანაში იმყოფებოდა.
სათვალთვალო კამერების მიერ დაფიქსირებული კადრები “კურიერმა” გუშინ გაასაჯაროვა. ადვოკატ მუხრან ღურწკაიას თქმით, მისი დაცვის ქვეშ მყოფი პირი არც შაქარაშვილს იცნობდა და არც იმ გოგონას, ვისი დაბადების დღეც იყო. ნაძალადევში მცხოვრები ახალგაზრდა ავტობანზე მას შემდეგ მოხვდა, რაც მას სუფრაზე მყოფი ერთ-ერთი პირი ტელეფონით დაუკავშირდა. გამოკითხვაზე იმყოფებოდნენ გიორგი შაქარაშვილის მეგობრებიც, თუმცა მათ ტერიტორია კომენტარის გარეშე დატოვეს.
“ავტომობილი დაფიქსირებული იყო სათვალთვალო კამერების მიერ ავტობანზე და ამიტომ დაიბარეს. არ იცნობდა ჩემი დაცვის ქვეშ მყოფი გიორგი შაქარაშვილს და არც იმ გოგონას, ვისი დაბადების დღეც იყო. ერთ-ერთი, ვინც სუფრაზე იყო, დაუკავშირდა ჩემი დაცვის ქვეშ მყოფს და იყო გარკვეული კითხვები,”- განაცხადა მუხრან ღურწკაიამ.
შეგახსენებთ, 19 წლის ფეხბურთელის, გიორგი შაქარაშვილის გარდაცვალების საქმეზე გამოძიება უკვე ოთხი მუხლით მიმდინარეობს: თავისუფლების უკანონოდ აღკვეთის, ძალადობის, ჯგუფური ძალადობის ორგანიზების და ჯგუფურად განხორციელებული განზრახ მკვლელობის მუხლებით.
საქმეზე 17 პირს აღკვეთის ღონისძიების სახით პატიმრობა აქვს შეფარდებული.