ევროპის პარლამენტმა უკრაინის საჭიროებისთვის ევროპაში საბრძოლო მასალისა და რაკეტების წარმოების ზრდას მხარი დაუჭირა. ევროპარლამენტის ვებგვერდზე გამოქვეყნებული ინფორმაციის თანახმად, შესაბამის პროექტს 446-მა დეპუტატმა დაუჭირა მხარი, 112-მა ევროპარლამენტარმა თავი შეიკავა, 67-მა კი ხმა წინააღმდეგ მისცა.
როგორც უკრაინული გამოცემა UNIAN წერს, ახლა, პოლიტიკური შეთანხმების მისაღწევად, ევროპარლამენტარები ევროკავშირის საბჭოსთან მოლაპარაკებებს დაიწყებენ, რასაც ივლისში კიდევ ერთი კენჭისყრა მოჰყვება.
საბრძოლო მასალის წარმოების მხარდაჭერის აქტი (ASAP) უკრაინისთვის საბრძოლო მასალისა და რაკეტების მიწოდების დაჩქარებას და ასევე, ევროკავშირის წევრი ქვეყნების დახმარებას ისახავს მიზნად მარაგების შევსებაში.