ეკატერინე ტიკარაძე – ვაქცინაციის პროცესს საკმაოდ კარგი დინამიკა აქვს

საქართველოს ჯანდაცვის მინისტრის ეკატერინე ტიკარაძის განცხადებით, საქართველოში ვაქცინაციის პროცესს საკმაოდ კარგი დინამიკა აქვს. ტიკარაძემ მოსახლეობას ამ კუთხით მეტად აქტიურობისკენ მოუწოდა.

„სახელმწიფო რა თქმა უნდა, გამოთქვამს მზაობას ყველა იმ პრობლემის გადაჭრისთვის, რაც კლინიკებს შესაძლოა, ჰქონდეთ. კლინიკების თანამშრომლობა ძალიან მაღალი ჩართულობისაა. მნიშვნელოვანია, რომ ამ პერიოდის განმავლობაში მათ საკმაოდ დიდი გამოცდილება დააგროვეს. დღესდღეობით ქვეყნის მასშტაბით უკვე აცრილია 262 ათასზე მეტი მოქალაქე. რა თქმა უნდა, აღნიშნული მაჩვენებელი დიდი არ არის, მაგრამ ვაქცინაციის პროცესს საკმაოდ კარგი დინამიკა აქვს“, – განაცხადა ტიკარაძემ.

ტიკარაძემ ვაქცინაციის პროცესებთან დაკავშირებით გეგმებზეც ისაუბრა.

„მოქალაქეებისთვის მნიშვნელოვანია ცოდნა, რამდენი ვაქცინაციის პუნქტი არსებობს ჩვენს ქვეყანაში, რა არის მათი გამტარუნარიანობა, ასევე რა რის შემდეგი გეგმა სახელმწიფოსი. ამ ეტაპისთვის ვაქცინაციის პროცესში ჩართულია 200-მდე კლინიკა, სადაც მუშაობს 281 ამცრელთა ბრიგადა. თითოეული ბრიგადის გამტარუნარიანობა არის 60 პაციენტი რვასაათიანი გრაფიკით. თუმცა წინა კვირაში არაერთი სამუშაო შეხვედრისას კლინიკების მხრიდან მოვისმინეთ, რომ მათ აქვთ მზაობა და შესაძლებლობა, გაზარდონ გამტარუნარიანობა როგორც ბრიგადების, ასევე შესაბამისი საათების დამატებით. ვიცით, რომ მოქალაქეების ნაწილი არის დასაქმებული. შესაბამისად, მათ ესაჭიროებათ ხელშეწყობა, რომ ვაქცინა ხელმისაწვდომი იყოს. ამასთან დაკავშირებითაც კლინიკების მხრიდან დაფიქსირდა მზაობა. ჩვენ ასევე გავზრდით სამუშაო საათებს. იმ რესურსით, რაც ამ ეტაპისთვის უკვე საქართველოში არის მობილიზებული, შეგვიძლია დღიურ რეჟიმში 17 000 მოქალაქის აცრა, რაც ორდღიანი სამუშაო ჭრილის პირობებში არის ნახევარი მილიონი მოქალაქის აცრა. მიგვაჩნია, საკმაოდ კარგი მაჩვენებელი იქნება, თუ ჩვენ ერთობლივი ძალისხმევით შევძლებთ და მომდევნო სამი თვის განმავლობაში ყოველთვე ავცრით ნახევარ მილიონ მოქალაქეს“, – განაცხადა ეკატერინე ტიკარაძემ.

რეკლამის ბანერი
წინა სტატიაშიტიკარაძე – არსებული რესურსით ჩვენ შეგვიძლია დღიურ რეჟიმში 17 000 მოქალაქის აცრა
შემდეგი სტატიასერგეენკო – როგორც პრაიდის მონაწილეებს აქვთ საკუთარი აზრის გამოთქმის უფლება, ისე აქვს ყველა დანარჩენს