ჩვენი ქვეყნისთვის ძალიან მნიშვნელოვანია ის წარმატება, რომელსაც ბატონმა ზურაბ პოლოლიკაშვილმა მიაღწია და ჩვენ მსოფლიოს ტურიზმის ორგანიზაციასთან ურთიერთობას გავაღრმავებთ, – ამის შესახებ პირველმა ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა გაერო-ს მსოფლიო ტურიზმის ორგანიზაციის ახალ გენერალურ მდივან ზურაბ პოლოლიკაშვილთან შეხვედრის შემდეგ განაცხადა.
„დღეს ჩვენ ძალიან მნიშვნელოვანი შეხვედრა გვქონდა ზურაბ პოლოლიკაშვილთან, რომელიც გაერო-ს მსოფლიო ტურიზმის ორგანიზაციის გენერალური მდივანია. მისთვის წლევანდელი ტურისტული გამოფენა პირველია. აღნიშნულ ღონისძიებას 40 ქვეყნიდან მაღალი რანგის სტუმრები, მათ შორის, მინისტრები დაესწრნენ”, – განაცხადა პირველმა ვიცე-პრემიერმა, რომელიც ესპანეთის სამეფოში ვიზიტით იმყოფება.
ვიზიტის ფარგლებში დიმიტრი ქუმსიშვილი მადრიდის ტურისტულ გამოფენაზე “FITUR 2018” საქართველოს ტურისტული პავილიონი დაათვალიერა. აღნიშნული გამოფენა მსოფლიოში ერთ-ერთი უმსხვილესია.
