“ევროპული საქართველოს” წევრის, ხათუნა გოგორიშვილის ინფორმაციით, ფინანსთა მინისტრ მამუკა ბახტაძეს ანგარიშზე დოლარში აქვს თანხა, ამიტომ მან დაპირება უნდა შეასრულოს და რომელიმე საქველმოქმედო ორგანიზაციაში გადარიცხოს.
გოგორიშვილმა ბახტაძეს მის მიერ პარლამენტის სხდომაზე გაკეთებული განცხადება შეახსენა, რომ იმ შემთხვევაში, თუკი მის ანგარიშზე უცხოურ ვალუტაში აღმოჩნდებოდა თანხა, მზად იყო დაეხარჯა.
გოგორიშვილმა თანხის ზუსტი ოდენობა არ დაასახელა, თუმცა აღნიშნა, რომ ბახტაძის დეკლარაციაში აღნიშნულია, რომ მას დოლარში თანხა აქვს.
“დეკლარაციაში აღნიშნულია, რომ თქვენ ანგარიშზე გაქვთ თანხა დოლარში. ახლა შეასრულეთ დაპირება და რომელიმე ბავშვთა და მოხუცთა ორგანიზაციას დაეხმარეთ”, – მიმართა ბახტაძეს გოგორიშვილმა.
თავის მხრივ, ფინანსთა მინისტრმა აღნიშნა, რომ მას ანგარიშზე დოლარში თანხა არ აქვს და ეს კორპორატიული ანგარიშია.
