ბერძნულ-რომაული სტილით მოჭიდავეთა ნაკრების მთავარი მწვრთნელის თანამდებობა ბეგი დარჩიამ დატოვა. Sportall.ge-ს ინფორმაციით, მან უკვე დაწერა განცხადება, რაც ფედერაციამ დააკმაყოფილა. მის ნაცვლად მოვალეობის შემსრულებლად კი მისივე შეგირდი, ევროპის ჩემპიონი და ლონდონის ოლიმპიადის ფინალისტი რევაზ ლაშხი დაინიშნა.
ლაშხი მოვალეობას 1-ელ იანვრამდე შეასრულებს, მერე კი ფედერაცია ჩვეულებრივ დანიშნავს მწვრთნელს. ოღონდ ეს უკვე ფედერაციის ახალი ხელმძღვანელობა იქნება, რადგან 17 დეკემბერს ფედერაციის საანგარიშო-საარჩევნო ყრილობაა დანიშნული, სადაც პრეზიდენტის არჩევნებიც ჩატარდება.
ამ პოსტზე განაცხადების მიღება 9 დეკემბერს, 18 საათზე შეწყდება, ჯერჯერობით კი, საქართველოს ჭიდაობის ეროვნული ფედერაციის საიტის ცნობით, სამმა კანდიდატმა შეიტანა განცხადება – მოქმედმა პრეზიდენტმა მანუჩარ კვირკველიამ, გეგა გეგეშიძემ და ვეტერანმა მოჭიდავე ესტატე გოგლიჩიძემ.
