საქართველოს პარლამენტის იურიდიულ საკითხთა კომიტეტის თავმჯდომარე ანრი ოხანაშვილი აცხადებს, რომ ლუკა სირაძის გარდაცვალების საქმეზე წარმოებულ გამოძიებაზე საკანონმდებლო ორგანო საპარლამენტო კონტროლს განახორციელებს.
კომიტეტის დღევანდელ სხდომაზე ანრი ოხანაშვილმა ლუკა სირაძის საქმეზე ისაუბრა და სახელმწიფო უწყებებს მოუწოდა, საგამოძიებო პროცესი ისე წარმართონ, რომ საზოგადოებაში საკითხზე კითხვები არ დარჩეს.
დეპუტატი საგამოძიებო პროცესში სახელმწიფო ინსპექტორის ჩართვას მიესალმება და ამბობს, რომ მომხდარზე სახელმწიფო ინსპექტორმა რეაგირება მოახდინა და ერთი პირია დაკავებული.
„ყველას გვმართებს დაფიქრება, სკოლას, უწყებებს, საზოგადოებას რაოდენ სიფრთხილე გვმართებს ბავშვებთან“, – აღნიშნავს დეპუტატი.
ამასთან, ანრი ოხანაშვილი საქმეზე ოპონენტების შეფასებებსაც გამოეხმაურა და აღნიშნა, რომ მძიმე მოსასმენია, როცა ასეთ ტრაგიკულ მოვლენას პოლიტიკური მიზნებისთვის იყენებენ. „ეს არის უსინდისობა“, – დასძინა დეპუტატმა.
