“თბილისის მერია სოციალურად დაუცველებისთვის ელექტროენერგიის ტარიფის სუბსიდირებას მოახდენს”–განცხადება ამის შესახებ რამდენიმე წუთის წინ დედაქალაქის მერის მოადგილემ, ირაკლი ლექვინაძემ გააკეთა.
შეგახსენებთ, რომ სემეკის მიერ დღეს მიღებული გადაწყვეტილებით ელექტროენერგია საშუალოდ 4 თეთრით გაძვირდა.
პირველი საფეხურის მომხმარებელს, რომელიც 101 კილოვატამდე ელექტროენერგიას მოიხმარს, ტარიფი გაუძვირდა 13 თეთრამდე, სხვაობა კი მოქმედ ტარიფთან შედარებით 3 თეთრია. მეორე საფეხურის მომხმარებლებისთვის, რომელიც 101-დან 301 კილოვატამდე ელექტროენერგიას მოიხმარს, ტარიფი გაიზარდა 17 თეთრამდე, სხვაობა დაახლოებით 4.5 თეთრს შეადგენს. ხოლო მე-3 საფეხურის მომხმარებლებისთვის, რომლებიც ელექტროენერგიას 301 კილოვატიდან ზემოთ მოიხმარენ, ისინი ძირითადად მცირე და საშუალო ბიზნესის წარმომადგენლებს წარმოადგენენ, ტარიფი გაიზარდა 22 თეთრამდე და სხვაობა ამ დროისთვის შეადგენს 4 თეთრზე მეტს.