რუსეთის გენშტაბის ხელმძღვანელის, ვალერი გერასიმოვის განცხადებით, თავდაცვის სამინისტრომ მასშტაბური სამხედრო წვრთნის კავკასია-2016-ის დაგეგმვისა და ჩატარებისას გაითვალისწინა პარალელურად მიმდინარე ქართულ-ამერიკული სამხედრო სწავლება. ამის შესახებ რუსული მედია იტყობინება.
“რა თქმა უნდა, ჩვენ გავითვალისწინეთ ამერიკულ-ქართული სწავლება, რომელშიც 1500-მდე სამხედრო მონაწილეობდა. ჩვენ მათი მოქმედებები გავითვალისწინეთ” – განაცხადა გერასიმოვმა.
მისივე თქმით, „წვრთნები უკრაინის წინააღმდეგ არ იყო მიმართული, როგორც ამის შესახებ ზოგიერთი მედია საშუალება წერდა“
რუსეთის შეიარაღებული ძალების სტრატეგიული წვრთნა კავკასია-2016 5-10 სექტემბერს სამხრეთის სამხედრო ოლქის ტერიტორიაზე გაიმართა. სწავლებაში 120 ათასზე მეტი ჯარისკაცი მონაწილეობდა. სწავლება ჩატარდა როგორც დე ფაქტო აფხაზეთისა და სამხრეთ ოსეთის ე.წ. რესპუბლიკის ტერიტორიაზე, ასევე ანექსირებული ყირიმშიც.
