აშშ-ის ყოფილმა ელჩმა საქართველოში იან კელიმ განაცხადა, რომ დასავლეთი საქართველოს მთავრობის ამჟამინდელი მოქმედებებით შეშფოთებულია.
კელის თქმითვე, კარგია, რომ საქართველომ უცხოელი აგენტების შესახებ კანონპროექტი არ მიიღო, თუმცა ქვეყანაში დემოკრატიული ძალების დემონიზება საქართველოში კვლავ მიმდინარეობს.
“ჩემი ბევრი ქართველი მეგობარიც შეშფოთებულია მიმართულების იმ ტრაექტორიით, რითაც მიდის საქართველო, როცა საქმე ეხება მის ურთიერთობას აშშ-ის ოფიციალურ წარმომადგენლებთან და არსებობდა შიში, რომ მთავრობა გადაუხვევდა დასავლური ინტეგრაციის გზასაც, მაგრამ ყველაზე შემაშფოთებელი ქმედება მთავრობის მხრიდან იყო სწორედ უცხოელი აგენტების შესახებ კანონპროექტის მიღება. ეს აბსოლუტურად შეუსაბამოა დემოკრატიულ სტანდარტებთან და ბევრი დასავლელი ლიდერი აღნიშნავდა ამას.
მე ძალიან მოხარული ვარ, რომ მათ გამოითხოვეს ეს კანონი, მაგრამ ვფიქრობ, რომ დემოკრატიული ძალების დემონიზება საქართველოში კვლავ მიმდინარეობს, რაც გამოიხატება წერტილოვან თავდასხმებზე. კარგია, რომ კანონი არ იქნა მიღებული, მაგრამ ჩვენ ჯერაც ძალიან შეშფოთებული ვართ მთავრობის ამჟამინდელი მიმართულებით,- განაცხადა იან კელიმ „ფორმულასთან“ საუბრისას.
