მმართველობის ღია და გამჭვირვალე სისტემის შექმნის, გადაწყვეტილებების პროცესში საზოგადოების მაქსიმალური ჩართულობის მიზნით, საქართველოს პრემიერ-მინისტრი შეხვედრებს განაგრძობს.
პრემიერ-მინისტრის პრესსამსახურის ინფორმაციით, შეხვედრები გრძელდება როგორც პოლიტიკური პარტიებთან, ასევე სამოქალაქო საზოგადოების წარმომადგენლებთან და დაინტერესებულ ჯგუფებთან.
მათივე ცნობით, გიორგი კვირიკაშვილი მიიჩნევს, რომ მნიშვნელოვანია დიალოგი საზოგადოების ყველა ჯგუფთან, მათ შორის არასაპარლამენტო ოპოზიციასთან. პრემიერ-მინისტრი მზად არის, მოისმინოს და განიხილოს არგუმენტები, რათა გადაწყვეტილებები მიღებული იყოს მაქსიმალური ჩართულობის და მსჯელობის შედეგად. პრემიერ-მინისტრმა უკვე გამართა შეხვედრები ინტერპარტიული ჯგუფისა და არასამთავრობო ორგანიზაციების წარმომადგენლებთან და მსგავსი დიალოგის ფორმატი გაგრძელდება. მთავრობის მეთაურის განცხადებით, ყოველთვის იარსებებს თემები, რაზეც შეთანხმება ვერ მოხდება, თუმცა დიალოგის ფორმატი უმნიშვნელოვანესია, რადგან ეს არის კომპრომისისკენ მიმართული ერთადერთი გზა, რომელიც ჯანსაღ პოლიტიკურ პროცესს უზრუნველყოფს.
შეხვედრების ფორმატში არაერთი მნიშვნელოვანი საკითხი დაისვა, მათ შორის, საარჩევნო სისტემის რეფორმა. ამ თემის გარშემო, მაჟორიტარული სისტემის გაუქმების ვადების გარდა, არაერთი საკითხის განხილვა მოხდა. პრემიერ-მინისტრი მიიჩნევს, რომ ეს არის ნორმალური პროცესი და შესაძლოა მოხდეს გარკვეულ თემებზე პოლიტიკური შეთანხმება. იმავე კონტექსტში დასმული პრობლემის გადაჭრა, საარჩევნო პროცესში ე.წ. სპეციალური უბნების შექმნასთან დაკავშირებით, სწორედ მსგავსი შეთანხმებით მოხდა, რაზეც პრემიერ-მინისტრმა დააფიქსირა ხელისუფლების პოლიტიკური ნება და უახლოეს მომავალში სპეც.უბნების დარეგულირებასთან დაკავშირებული საკანონმდებლო ცვლილებები საქართველოს პარლამენტს გადაეცემა განსახილველად.
