მინდა ყველა პატრიოტს „ვარდების რევოლუციის“ 20 წლის იუბილე მივულოცო, იმ რევოლუციისა, რომელმაც საქართველო თანამედროვე და ცივილიზებულ სახელმწიფოდ აქცია, – განაცხადა „ერთიანი ნაციონალური მოძრაობის“ პოლიტიკურმა მდივანმა, გიორგი ბარამიძემ.
როგორც მან ბრიფინგზე განაცხადა, „დღეს, როგორც არასდროს, „ვარდების რევოლუციის“ იდეები მნიშვნელოვანია“.
„თავდაპირველად, მინდა ყველას მოგილოცოთ გიორგობის ბრწყინვალე დღესასწაული და ჩვენი ქვეყნის მშვიდობიანი გამთლიანება გისურვოთ. ასევე, მინდა ყველა პატრიოტს „ვარდების რევოლუციის“ 20 წლის იუბილე მივულოცო, იმ რევოლუციისა, რომელმაც საქართველო თანამედროვე სახელმწიფოდ აქცია. ამ წლების განმავლობაში, საქართველოში ის ინსტიტუციები შეიქმნა, რომლებმაც საშუალება მოგვცა, დღეს მოლდოვასა და უკრაინასთან ერთად ევროკავშირში გაწევრიანებაზე ვისაუბროთ, ასევე, ევროკავშირის კანდიდატის სტატუსზე და ეს ყველაფერი რეალობა იყოს. მინდა ყველა პატრიოტს, განურჩევლად პარტიულობისა მივულოცო და განსაკუთრებით, ჩვენს პატრიოტ პოლიციელებს, რომლებიც იმ პოლიციას წარმოადგენენ, რომელიც მიხეილ სააკაშვილის გუნდმა შექმნა, ჩვენს სამხედროებს, ჩვენს ჯარს, რომლებიც ასევე, სამშობლოს სადარაჯოზე არიან და რომელიც მიხეილ სააკაშვილის ხელმძღვანელობით შეიქმნა. მინდა მივულოცო ყველა პედაგოგს, რომელიც დღეს სულ სხვა მდგომარეობაშია, ვიდრე „ვარდების რევოლუციამდე“ იყო, მინდა მივულოცო ლექტორებს, მოსწავლეს, სტუდენტს. ის, რომ მათ არ სჭირდებათ ჩაწყობით და ფულის გამოყენებით გამოცდების ჩაბარება. მივულოცო ყველა იმ მოქალაქეს, რომელიც იუსტიციის სახლების სერვისით სარგებლობს და ყველა ადამიანს, რომლისთვისაც ძვირფასია ნორმალური, ცივილიზებული საქართველო. მინდა მივულოცო ოკუპაციის ხაზის გასწვრივ ჩვენს მოქალაქეებს, რომელიც მიუხედავად ოკუპანტის ყოველდღიური აგრესიის, პროვოკაციების, ჩვენი მოქალაქეების გატაცებისა და მკვლელობისა, ისინი მედგრად დგანან სამშობლოს სადარაჯოზე და იციან, რომ ჩვენი ერთიანობით ჩვენი მეგობრების დახმარებით საქართველო აუცილებლად გამთლიანდება მშვიდობიანად. მინდა საქართველოს ყველა პატრიოტს, როგორც ქვეყნის შიგნით, ასევე ქვეყნის გარეთ მყოფ ემიგრანტებს მივულოცო დღევანდელი დღე, რომლებმაც ქვეყნის სიდუხჭირის, თავდასხმების და სხვა მრავალი მიზეზის გამო დატოვეს საქართველო, მაგრამ იმედი აქვთ, რომ დაბრუნდებაიან, მომავალს იმედით უყურებენ და სურთ, რომ ჩვენი ქვეყანა იყოს განვითარებული, მშვიდობიანი, ერთიანი, გამთლიანებული, ცივილიზებული, ქართული, მაშასადამე, ევროპული სახელმწიფო, რომელიც ევროკავშირისა და ნატო-ს წევრი იქნება. დღეს, როგორც არასდროს, „ვარდების რევოლუციის“ იდეები მნიშვნელოვანია; ის, რომ რაც ჩვენ შევძელით, მომავალში გაგრძელდეს, რაც ვერ შევძელით და სადაც იყო პრობლემები, ის პრობლემები ყველამ ერთად გამოვასწოროთ ერთობლივი ძალისხმევით“, – განაცხადა გიორგი ბარამიძემ.
