მაშინ, როდესაც უახლოეს დღეებში მიხეილ სააკაშვილის სტრასბურგის სასამართლო პროცესი იქნება და მაშინ, როდესაც ყველაფერია გასაკეთებელი, რომ მზად ვიყოთ ყველანაირი სცენარის განვითარებისთვის, როგორც მმართველი გუნდიდან, ისე ოპოზიციიდან, რიგი სამუშაოებია გასაწევი და ამ დროს ვნიშნავთ რაღაც არჩევნებს, – ამის შესახებ „ნაციონალური მოძრაობის“ წევრმა, ბაჩო დოლიძემ განაცხადა.
დოლიძის თქმით, მიზანმიმართულად ხდება მნიშვნელოვანი თემიდან ყურადღების გადატანა.
„ჩვენ შევთავაზეთ, ვნახოთ რა ხდება და მერე ჩაატარეთთქო,ამაზეც არ მოდიან, რადგან მათთვის უფრო მნიშვნელოვანია სასამართლო საკითხის გადაფარვა და თანამდებობების განაწილება. დღეს სხვათაშორის 100 დღე შესრულდა, რაც თავმჯდომარეა, ამ 100 დღის განმავლობაში ყოველდღე ვიღაცას სადღაც ნიშნავენ. შესაბამისად, ნამდვილად არ მივეხმარებით იმ პროცესს, რომელიც გულისხმობს პარტიის დაზიანებასა და დასუსტებას. ყველაფერს გავაკეთებთ იმისათვის, რომ ამ პარტიამ ნაკლები ზიანი მიიღოს“, – განაცხადა დოლიძემ.
ამასთან, დოლიძე გამოეხმაურა პარტიის რამდენიმე რეგიონული ორგანიზაციის ხელმძღვანელების მიერ პოსტების დატოვების საკითხს.
„პარტია საერთოდ კარს უხურავს იმ ადამიანებისთვის, რომელზეც იდგა და დგას პარტია, რადგან ახალი მენეჯმენტის რაოდენობა რომ ავიღოთ, ვერასდროს გადააჭარბებს ჩვენი ამომრჩევლის და ჩვენი რიგითი წევრების რაოდენობას, გაცილებით დიდი ჯარია. რასაც დღეს აკეთებენ მიზანმიმართულად, ყველასთვის კარის დაკეტვა და რიტორიკა, რომ თუ რაღაც არ მოგწონს, წადი, თითოეული ადამიანის წასვლა არის პრობლემა ამ პარტიისთვის, ამას ვერ ხვდებოდე ვერ აცნობიერებდე, ეს კიდევ დამატებითი პრობლემაა“, – განაცხადა დოლიძემ.
