MAP არ არის საქართველოს ამოცანა, საქართველოს ამოცანა არის ნატო-ში გაწევრიანება, – ამის შესახებ საქართველოს თავდაცვის მინისტრმა თინათინ ხიდაშელმა “მაესტროს ფაქტორში” პირდაპირი ჩართვისას განაცხადა.
მისი თქმით, საქართველო არ იბრძვის MAP-ის მიღებისთვის, არამედ იბრძვის ნატო-ში გაწევრიანებისთვის და ნებისმიერი მოქმედება, რომელიც საქართველოს ნატო-ს წევრობას პრაქტიკულად რეალისტურს გახდის, არის საქართველოს ამოცანა როგორც დეკემბრის მინისტერიალზე, ისე ვარშავის სამიტზე.
“ამას სახელად რა დაერქმევა, საერთოდ არავითარი მნიშვნელობა არ აქვს. ჩემი პირადი აზრი თუ გაინტერესებთ, როგორც თავდაცვის მინისტრის, მე ვფიქრობ, რომ MAP-ი საქართველოს არ სჭირდება, საქართველოს აბსოლუტურად ყველა ინსტრუმენტი აქვს დღეს (და ეს ინსტრუმენტები ყოველდღიურად იზრდება) და იმაზე ათჯერ და ოცჯერ მეტი, ვიდრე რომელიმე აქამდე MAP-ის მქონე ან დღეს MAP-ის მქონე ქვეყანას აქვს. MAP-ს აქვს მხოლოდ პოლიტიკური დატვირთვა”, – განაცხადა ხიდაშელმა და დასძინა, რომ MAP-ი საკრალური მცნება გახდა ქართველებისთვის და პოლიტიკური დატვირთვა შეიძინა, თუმცა მისთვის, როგორც თავდაცვის მინისტრისთვის, ამაზე უფრო მნიშვნელოვანია უსაფრთხოების გარანტიები მივიღოთ. რაც შეეხება იმას, თუ როგორ უნდა მოხდეს ეს, ხიდაშელი მიიჩნევის, რომ _ ნატო-ს წევრობის გზაზე დადგომით. თავდაცვის მინისტრის თქმით, ახლა არა წევრობის, არამედ MAP-ის გზაზე ვდგავართ და ეს შუალედური რგოლი უნდა ამოვაგდოთ.
“ეს მოხდება MAP-ის მიღებით თუ იმის თქმით, რომ MAP-ი აღარ არის საქართველოსთან მიმართებაში რელევანტური და აღარ გვჭირდება, ამას ჩემთვის და ჩემი ქვეყნისთვის არავითარი მნიშვნელობა არა აქვს, თუ განსაკუთრებული აკვიატებები არა გვაქვს, როგორც ზოგიერთ პოლიტიკურ ძალას დასჩემდა”, – განაცხადა თინათინ ხიდაშელმა.
