ზვიად გამსახურდიას სავარძელში დღეს იჯდა ჯალალედინი, – ამის შესახებ პარტია „გამარჯვებული საქართველოს“ წევრმა, გუბაზ სანიკიძემ რუსთაველის გამზირზე, პარლამენტის წინ აქციაზე განაცხადა.
გუბაზ სანიკიძის თქმით, რაც დღეს საქართველოს პარლამენტში მართლმადიდებლობის საპარლამენტთაშორისო ასამბლეის 26-ე გენერალურ სესიაზე მოხდა, კატასტროფა იყო.
„საქართველოს საკანონმდებლო ორგანოში, პარლამენტში ვიხილეთ კატასტროფა, ჩვენი ეროვნული გლოვა. დღეს ზვიად გამსახურდიას სავარძელში იჯდა ჯალალედინი. დღეს სერგეი გავრილოვის იქ ჯდომა ჩემთვის იყო ის, რაც მოხდა საუკუნეების წინ. მე ვნახე გუმბათმონგრეული სიონი და ზედ შემომჯდარი ბოროტი სულთანი ჯალალედინი. ეს ხდება ჩვენს ქვეყანაში. თბილისში ჯალალედინია შემოსული. თბილისი და სრულიად საქართველო ფეხზე უნდა დადგეს, უკან მოგვრჩება პარტიებიც და ერთმანეთის წარსულში ჩხიკინიც. ვინც წარსულს ჩხრეკს, ის მომავალს ვერასდროს მიაღწევს. ნუ ამართლებთ საკუთარ შიშებს, ვინც ახლა შორიდან გვიყურებს და ჩვენზე ჭკვიანები ჰგონიათ თავი. მარტო ვერაფერს მიაღწევთ, ნუ გაიხდით საკუთარი შვილებისა და შვილიშვილების საწყევრად თავს“, – განაცხადა გუბაზ სანიკიძემ.
