საქართველოს პირველი პრეზიდენტის, ზვიად გამსახურდიას ვაჟი, კონსტანტინე გამსახურდია სოციალურ ქსელში მთაწმინდის პანთეონში მდებარე საფლავზე დაფის განთავსებას ეხმაურება, რომელზეც დატანილია წარწერა „ელია“.
“ზვიად გამსახურდიას საფლავზე დაფის განთავსება წარწერით „ელია“ სრულიად მიუღებელია. დაფა (რაც არის ვინმე გელა დიაკონიძის “შედევრი”) არაერთხელ აიღეს და კვლავ ჯიუტად აბრუნებენ, ეს უკვე მხოლოდ პირადი რწმენის გამოხატვა კი არა, ეროვნული მნიშვნელობის საფლავის ვანდალური ხელყოფა, ისტორიული პიროვნების სახელის დამახინჯება და მისი სექტანტურ კულტად ქცევის მცდელობაა. უკვე არაერთმა დაბნეულმა მნახველმა გვკითხა მეც და გიორგისაც, რას ნიშნავს ეს დაფა და ზედ დატანილი ეს წარწერა.
ასეთი ქცევა არის უპასუხისმგებლო თვითნებობა, საზოგადოების უპატივცემულობა და ეროვნული მეხსიერებით მანიპულირება. შესაბამისმა უწყებებმა უნდა აღკვეთონ საფლავის იერსახის უნებართვო ცვლილება და უზრუნველყონ მისი ღირსეული დაცვა. ზვიად გამსახურდიას სახელი ეკუთვნის საქართველოს ისტორიას და არა რომელიმე ვიწრო ჯგუფის გამოგონილ კულტს”,_წერს კონსტანტინე გამსახურდია სოციალურ ქსელში.
