საქართველოს მეხუთე პრეზიდენტმა სალომე ზურაბიშვილმა ოსლოს თავისუფლების ფორუმზე სიტყვით გამოსვლისას ქვეყანაში არსებული პოლიტიკური ვითარება უმძიმესად შეაფასა. მისი თქმით, საქართველო დემოკრატიის შუქურიდან დიქტატურის საფრთხის წინაშე მყოფ სახელმწიფოდ იქცა.
„დღეს ალბათ ყველაზე რთულ პერიოდს გავდივართ. გუშინ საქართველო დემოკრატიის შუქურა და ევროინტეგრაციის საკითხებში ლიდერი იყო. რეფორმებისა და ტრანსფორმაციის მოდელი იყო. 2008 წელს რუსეთის აგრესიის მიუხედავად, მისი ტერიტორიის 20%-ის ოკუპაციის მიუხედავად, მან სუვერენიტეტის შენარჩუნება შეძლო.
მაგრამ ძალიან სწრაფად, ის, რაც ბოლო რამდენიმე წლის განმავლობაში მოხდა, დემოკრატიისა და სახელმწიფოს მიტაცებაა. ეს მოსახლეობის გაუცხოება და დამორჩილებაა. ახლა იმ წერტილს მივაღწიეთ, როდესაც ან საკუთარი თავი უნდა გადავარჩინოთ, ან დიქტატურას დავემორჩილოთ“, — განაცხადა სალომე ზურაბიშვილმა.
