“მრეწველთა“ ერთ-ერთი ლიდერი, დეპუტატი ზურაბ ტყემალაძე პარტიის მიერ კვალიფიციური სუბიექტის სტატუსის მოპოვებისთვის ბარიერის 2%-მდე შემცირების ინიციატივას მხარს უჭერს.
როგორც ტყემალაძემ “ინტერპრესნიუსს“ განუცხადა, მრავალპარტიული სისტემის განვითარებისათვის, თუკი ხელი იმ პარტიასაც შეეწყობა, ვინც არჩევნებში ხმების 2%-ს დააგროვებს, ცუდი არ იქნება.
“პროექტს ინიცირების შემთხვევაში, მხარს დავუჭერ. მართალია ამას გარკვეული დაფინანსება ებმის თან, მაგრამ ძირითადი დაფინანსება მიბმულია არჩევნებში მიღებული ხმების რაოდენობაზე, ფრაქციის არსებობა – არარსებობაზე, არის საბაზო დაფინანსება და ასე შემდეგ. მრავალპარტიული სისტემის განვითარებისათვის, თუკი ხელი იმ პარტიასაც შეეწყობა, ვინც ხმების 2%-ს აგროვებს, ეს ცუდი არ იქნება. ეს დაახლოებით 40 ათასი ხმაა და 40 ათასი მხარდამჭერი თუ გყავს, ეს უკვე კარგია“, – განუცხადა “ინტერპრესნიუსს“ ტყემალაძემ.
დეპუტატის თქმით, 2%-იანი ბარიერის დაწესების შემთხვევაში, ე.წ. რეგიონული პარტიების შექმნის თავიდან აცილების მიზნით, კანონით უნდა განისაზღვროს, რომ მიღებული ხმები უნდა მოიცავდეს საქართველოს ნახევარზე მეტს მაინც. “ეს იმას ნიშნავს, რომ პარტიამ 40 ათასი მხარდამჭერი უნდა მოაგროვოს არა ერთ კონკრეტულ რეგიონში, არამედ საქართველოს მასშტაბით“, – აღნიშნა ტყემალაძემ.
“მოქალაქეთა პოლიტიკური გაერთიანების შესახებ“ ორგანული კანონის თანახმად, იმისთვის, რომ პარტიას ე.წ. კვალიფიციური პარტიის სტატუსი მიენიჭოს და სახელმწიფო ბიუჯეტიდან თანხა მიიღოს, მას დამოუკიდებლად ან საარჩევნო ბლოკის შემადგენლობაში საპარლამენტო ან ადგილობრივი თვითმმართველობის არჩევნებში ხმების 3% ან 3%-ზე მეტი უნდა ჰქონდეს მიღებული. ახლა საუბარია აღნიშნული ბარიერის 2%-მდე დაწევაზე.
