ახალი პოლიტიკური ცენტრის „გირჩის“ დამფუძნებელი ზურაბ ჯაფარიძე არჩევნების შემდგომ განვითარებულ მოვლენებს ფეისბუქზე ეხმაურება. როგორც ჯაფარიძე წერს შექმნილ სიტუაციას რამდენიმე მიზეზი აქვს, რომლებსაც საფუძველი ნაციონალური მოძრაობის დროს ჩაეყარა და შემდგომში ივანიშვილმა ეს მიზეზები სათავისოდ გამოიყენა. ზურაბ ჯაფარიძის თქმით ერთი პარტიის მიერ საკონსტიტუციო უმრავლესობის მოპოვება ქვეყნისთვის საფრთხეა და სწორედ ამ საფრთხის თავიდან ასაცილებლად ის არჩევნებზე წასვლას და მეორე ტურში „ოცნების“ წინააღმდეგ აპირებს ხმის მიცემას:
„მე არ მჯერა რომ არჩევნების მეორე ტური ტოვებს მნიშვნელოვან შანსს ოცნებამ არ მიიღოს საკონსტიტუციო უმრავლესობა. არც იმის მჯერა რომ პარლამენტში შესვლის შემდეგ (რაც ცალსახად სწორი გადაწყვეტილებაა) რამდენიმე ’რამაზ ნიკოლეიშვილი’ პრინციპულობის მაგალითს გვაჩვენებს. მეტიც, მე მჯერა რომ სამწუხარო რეალობა რომელშიც აღმოვჩნდით მნიშვნელოვანწილად სწორედ ნაციონალური მოძრაობის დამსახურებაა.
ენმ-მა არ შეცვალა არსებული საარჩევნო სისტემა რადგან სჭირდებოდა ძალაუფლების შესანარჩუნებლად. ენმ-მა არ შეამცირა ბიუროკრატია რადგან სჭირდებოდა ’ადმინიატრაციული რესურსი’ ძალაუფლების შესანარჩუნებლად. ენმ-მა, ხელისუფლებაში ყოფნის პერიოდში, ისევე როგორც მერე, გააკეთა ყველაფერი რომ წარმოდგენილიყო როგორც ’ერთადერთი პროდასავლური ძალა პოლიტიკურ ველზე. ივანიშვილმა უბრალოდ გამოიყენა ყოველივე ეს და აქვს დიდი შანსი მიიღოს საკონსტიტუციო უმრავლესობა მომავალ პარლამენტში
მე ასევე არ მჯერა რომ ოცნება/ივანიშვილი აპირებს საქართველო მოწყვიტოს ევროპას და წაიყვანოს ევრაზიის კავშირისკენ. არც იმის მჯერა რომ ივანიშვილი კრემლიდან იღებს ინსტრუქციებს. მაგრამ, საკონსტიტუციო უმრავლესობა არის საფრთხე ყველასთვის და ყველაფრისთვის, მათ შორის ოცნებისთვისაც, მიუხედავად იმისა მოგწონს ოცნება თუ არა. აქამდე არ გამიკეთებია არანაირი მოწოდება. გირჩის წევრები თუ მხარდამჭერები თავისუფალი ადამიანები არიან და თავად იღებენ გადაწყვეტილებებს. არც ამ ტექსტით ვაპირებ ვინმეს რამისკენ მოვუწოდო, მაგრამ მინდა ჩემი პოზიცია გავხადო საჯარო. მე ვაპირებ არჩევნების მეორე ტურში მისვლას და ხმის მიცემას საკონსტიტუციო უმრავლესობის საფრთხის წინააღმდეგ. jafarმესმის რომ შანსები ძალიან, ძალიან პატარაა, მაგრამ ჩემთვის ეს პრინციპის საკითხია და ვალდებულებაა ჩემი შვილების წინაშე“- წერს ზურაბ ჯაფარიძე ფეისბუკზე.
