ზურაბ ჭიაბერაშვილი: საყოველთაო ჯანდაცვა 6 თვეში 24 მლნ ლარით გაირღვა

"მილიარდერი ივანიშვილის მთავრობა ხალხს აღარიბებს და ათასობით ადამიანს სოციალურ დახმარებას უწყვეტს" - ზურაბ ჭიაბერაშვილი

ერთიანი ნაციონალური მოძრაობის სამოქალაქო საზოგადოებასთან ურთიერთობის მდივან ზურაბ ჭიაბერაშვილის განცხადებით, საყოველთაო ჯანდაცვა 6 თვეში 24 მლნ ლარით გაირღვა.

„6 თვის ბოლომდე კიდევ 2 კვირაა დარჩენილი და ჯანდაცვის სამინისტრომ უკვე ამოწურა საყოველთაო ჯანდაცვის პროგრამის 6 თვის 308 მლნ ლარის ბიუჯეტი. დარჩენილ 14 დღეში მას დაახლოებით 24 მლნ ლარის დამატება სჭირდება.

ამ თანხას დავით სერგეენკო ტრადიციულად სამინისტროს მეოთხე კვარტალის ასიგნებებს მოაკლებს და ამჟამინდელ დეფიციტს ამით ამოავსებს, მაგრამ ამით მხოლოდ გაამწვავებს იმ პრობლემას, რომელთან გამკლავება წლის ბოლოს უკვე სხვა მთავრობას და სხვა მინისტრს მოუწევს.

დავით სერგეენკომ საყოველთაო ჯანდაცვის პროგრამაში შექმნილი პრობლემა კი აღიარა, თუმცა მდგომარეობის გამოსწორების გეგმის შემუშავება-განხორციელება არ შეუძლია.ჯანდაცვის მინისტრს არ გადაუდგამს რაიმე კონკრეტული ნაბიჯი, რაც იმის ვარაუდის საფუძველს მოგვცემდა, რომ მომდევნო თვეებში ხარჯვა უდეფიციტო იყოს. შესაბამისად, წელსაც – ისევე, როგორც 2015 წელს – საყოველთაო ჯანდაცვის პროგრამას მინიმუმ 75-80 მლნ ლარის დამატება დასჭირდება.

საყოველთაო ჯანდაცვის პროგრამის დეფიციტის ზომა მიუთითებს, რომ ჯანდაცვის მინისტრი უწყების საქმიანობას 9-თვიანი პერსპექტივით უყურებს – ანუ 2016 წლის ოქტომბრის საპარლამენტო არჩევნებამდე. “ქართულმა ოცნებამ” იცის, რომ არჩევნებს წააგებს და ყველაფერს ამ პერსპექტივით უყურებს: აღარ აინტერესებს, მერე რა იქნება.

აღსანიშნავია, რომ თუნდაც დეფიციტური ხარჯვით ჯანდაცვის სამინისტრომ კლინიკების დავალიანება სრულად ვერ დაფარა. 2015 წლიდან სამინისტროს კლინიკების მიმართ დაახლოებით 65 მლნ ლარის დავალიანება გადმოჰყვა, რომლის ნაწილი დღემდე არაა გადახდილი.ეს კი მედპერსონალის ხელფასების გაუცემლობაში, სამედიცინო მომსახურების ხარისხის დაქვეითებასა და პაციენტების მიერ ჯიბიდან გადახდების ზრდაში აისახება.“- განაცხადა ზურაბ ჭიაბერაშვილმა.

banner
წინა სტატიაშიპრეზიდენტის ეკონომიკური მრჩეველი ევროპის საინვესტიციო ბანკის წარმომადგენლებს შეხვდა
შემდეგი სტატიათბილისი ეუთო-ს საპარლამენტო ასამბლეის 25-ე ყოველწლიურ სესიას უმასპინძლებს