ზიმბაბვეში, კარიბას ტბაზე ბორნის ჩაძირვის შედეგად 44 ადამიანი დაიღუპა. ამის შესახებ ინფორმაციას BBC ადგილობრივ პოლიციაზე დაყრდნობით ავრცელებს.
სამართალდამცველების ცნობით, ტრაგედიის მთავარი მიზეზი გადატვირთულობა გახდა: 90 მგზავრზე გათვლილ ბორანზე ინციდენტის დროს 120 ადამიანი იმყოფებოდა, მათ შორის 12 ბავშვი. ხომალდი ძლიერი ტალღის დაჯახების შედეგად გადაბრუნდა.
ადგილზე სამძებრო-სამაშველო ოპერაცია ინტენსიურად მიმდინარეობს. ბოლო მონაცემებით, მაშველებმა 77 ადამიანის გადარჩენა შეძლეს.
მომხდარის გამო ზიმბაბვეს მთავრობამ საგანგებო მდგომარეობა გამოაცხადა და გარდაცვლილთა ოჯახის წევრებს მიუსამძიმრა:
„მთავრობა ღრმა მწუხარებას გამოთქვამს ამ ტრაგიკულ ინციდენტში დაღუპულთა ოჯახებისა და ახლობლების მიმართ“, — ნათქვამია ოფიციალურ განცხადებაში.
