ჟენევაში „დიდი შვიდეულის“ სამიტის წინააღმდეგ გამართულ საპროტესტო აქციაზე პოლიციასა და დემონსტრანტებს შორის დაპირისპირება მოხდა, პოლიციამ აქციის მონაწილეების დასაშლელად ცრემლსადენი გაზი გამოიყენა. ამის შესახებ „როიტერი“ წერს.
აქციის მონაწილეები აპროტესტებდნენ საფრანგეთში, ევიან-ლე-ბენში დაგეგმილ „დიდი შვიდეულის“ სამიტს. როგორც „როიტერი“ წერს, რამდენიმე დემონსტრანტმა ქვები ესროლა გაერო-ს სატელეკომუნიკაციო შენობას, ასევე გამოიყენა მაშხალები, მაშინ, როდესაც პოლიცია ცდილობდა მათ ტერიტორიიდან გაყვანას, რის შემდეგაც სამართალდამცველებსა და აქციის მონაწილეებს შორის დაპირისპირება მოხდა.
როგორც მედია იუწყება, დემონსტრანტებმა ქალაქის ცენტრში გამართული მსვლელობისას Tesla-ს მანქანას ცეცხლი წაუკიდეს. დემონსტრაციაში ათასობით ადამიანი იღებდა მონაწილეობას, მათ შორის გარემოსდამცველები, ფემინისტური ჯგუფები, იმპერიალიზმის მოწინააღმდეგეები, პალესტინის მხარდამჭერები და სხვა აქტივისტები.
ცნობისთვის, „დიდი შვიდეულის“ სამიტი 15-17 ივნისს, საფრანგეთის ქალაქ ევიან-ლე-ბენში გაიმართება. სამიტს, სხვა ლიდერებთან ერთად, დაესწრება უკრაინის პრეზიდენტი ვოლოდიმირ ზელენსკი. უსაფრთხოების უზრუნველსაყოფად დაახლოებით 16 000 პოლიციელი და ჟანდარმია განლაგებული.
