ვფიქრობ, პრეზიდენტმა ტრამპმა ჩემი ნდობა დაიწყო – გაიგო რეალურად ვის არ სურს ომის დასრულება, – ამის შესახებ უკრაინის პრეზიდენტმა, ვოლოდიმირ ზელენსკიმ ამერიკელ ულტრამემარჯვენე ბლოგერთან, ლორა ლუმერთან ინტერვიუში განაცხადა.
მისი თქმით, აშშ-ის პრეზიდენტმა გაიგო, რომ უკრაინას მშვიდობა სურს.
“პრეზიდენტმა [ტრამპმა] გაიგო რეალურად ვის არ სურს ომის დასრულება. პირიქითაც კი. მან გაიგო, რომ ჩვენ პუტინის გაჩერება გვინდა, გაიგო, რომ ნამდვილად გვსურს მშვიდობა. ვინაიდან, ადრე ხმები ისმოდა, რომ უკრაინას გაჩერება არ უნდა”, – განაცხადა ზელენსკიმ.
ზელენსკიმ ასევე, აღნიშნა, რომ უკრაინას, რა თქმა უნდა, გამარჯვება სურს.
“მაგრამ უპირველეს ყოვლისა ადამიანების სიცოცხლეებზე ვართ ფოკუსირებული. თუ ხვალ შევძლებთ ომის გაჩერებას, დაზავების მიღწევას, ეს უკეთესია, ვიდრე 10-20 წელი გამარჯვებისთვის ბრძოლა და ჩვენი ხალხის დაკარგვა. დაზავება საუკეთესო ალტერნატივაა.
ვფიქრობ, პრეზიდენტმა ტრამპმა ჩემი ნდობა დაიწყო და ეს საკვანძო მომენტია, თუ ტონის ცვლილებაზე ვისაუბრებთ,” – განაცხადა ზელენსკიმ.
უკრაინის პრეზიდენტის თქმით, ტრამპთან მისი ურთიერთობების გარდამტეხი მომენტი ვატიკანში მოკლე შეხვედრა გახდა, რომელიც 2025 აპრილს წმინდა პეტრეს ბაზილიკაში გაიმართა.
