ზელენსკი – რუსმა დამპყრობლებმა მარიუპოლიდან ათასობით ადამიანი გაიყვანეს, მათ შორის ხუთი ათასი ბავშვია

რუსმა დამპყრობლებმა მარიუპოლიდან ათასობით ადამიანი გაიყვანეს, მათ შორის ხუთი ათასი ბავშვია, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა. უკრაინის პრეზიდენტის თქმით, ეს ადამიანები სავარაუდოდ რუსეთში გადაიყვანეს, თუმცა უკრაინულ მხარეს ამასთან დაკავშირებით დაზუსტებული ინფორმაცია არ აქვს.

„რამდენიმე ათეული ათასი ადამიანი ძალით გადაიყვანეს რუსეთის ფედერაციაში. რა დაემართათ, არ ვიცით, სად არის მათი დოკუმენტები, არ ვიცით. მათ შორის რამდენიმე ათასი ბავშვია, ეს ვიცით, მაგრამ როგორ არიან, როგორია მათი ჯანმრთელობის მდგომარეობა, ამის შესახებ არაფერი ვიცით. გავიგეთ, რომ ხუთი ათასი ბავშვია დეპორტირებული ამ რეგიონიდან რუსეთში. ეს ძალიან მძიმე და რთული საკითხია. არის ბევრი ინფორმაცია, რომელიც უნდა გადავამოწმოთ“,- განაცხადა უკრაინის პრეზიდენტმა.

ზელენსკის თქმით, ამ ეტაპზე არც იმის თქმაა შესაძლებელი, რამდენი ადამიანია დარჩენილი მარიუპოლში.

„ერთი ვერსიით, ქალაქში 50-60 ათასი ადამიანია დარჩენილი, მეორე ვერსიით 100 ათასი. არის ასეთი ინფორმაციაც, რომ შესაძლოა იქ დარჩენილი 20-30 ათასი ადამიანი შეიძლება, დაიღუპოს“,- განაცხადა პრეზიდენტმა.

banner
წინა სტატიაშიუკრაინის მთავრობა ლუგანსკის მოსახლეობას დაუყოვნებლივ ევაკუაციისკენ მოუწოდებს
შემდეგი სტატიაუკრაინის გენშტაბი – რუსი ოკუპანტები ხარკოვის ნაწილობრივ ბლოკირებას აგრძელებენ, წარუმატებელი აღმოჩნდა ოკუპანტების შეტევა რამდენიმე დასახლების მიმართულებით