პოლიციელმა, გიორგი გადელიამ აქციის მონაწილეებს გამოგვიცხადა, რომ ხულიგნობის გამო დაგვიჭერს, – ამის შესახებ ხორავას ქუჩაზე მოკლული მოზარდის, დავით სარალიძის მამამ, ზაზა სარალიძემ განაცხადა.
სარალიძე ვაკე-საბურთალოს პოლიციის განყოფილებაში მივიდა იმის გასარკვევად, თუ კონკრეტულად რა ფაქტი იგულისხმება ხულინგობაში და რატომ დაემუქრა პოლიციელი აქციის მონაწილეებს.
“გამოცხადდა ვიღაც პოლიციელი, რომელიც აცხადებს, რომ არის ვაკე-საბურთალოს პოლიციის განყოფილების უფროსი, მაგრამ კონკრეტულად არ ასახელებს, რომელი განყოფილების, საპატრულო პოლიციის თუ კრიმინალურის. მან აქციის მონაწილეთაგან ჩამოთვალა რამდენიმე პირი, მათ შორის მე, ჩემი ძმა, და მალხაზ მაჩალიკაშვილი, რომ ხულიგნობის ფაქტზე უნდა დავეკავებინეთ. შემდეგ როგორც გავარკვიეთ, ეს არის ვიღაც გიორგი გადელია, არ ვიცი, რა თანამდებობას იკავებს პოლიციაში. მას ხშირად გამოუჩენია ჩემ დარბევაში ინიციატივა. ასე განმარტა: 11 სექტემბრიდანაა დაწყებული ძიება, შეიკრიბება ყველაფერი და ხულიგნობის ფაქტზე დაგიჭერთო. ასე პოლიციელს შეუძლია, ნებისმიერი ადამიანი გააჩეროს ქუჩაში და უთხრას, რომ ხულიგნობის ფაქტზე მეორე დღეს მას დაიჭერს. 11 სექტემბრიდანაა დაწყებული გამოძიება და მას მერე იმდენი ფაქტი და დარბევა მოხდა ჩვენ მიმართ, ძალადობა, შეხლა-შემოხლა და იმდენი ფაქტი იყო პოლიციის მხრიდან კარვების არგაშლასთან დაკავშირებით, რომ იმის გასარკვევად ვარ მოსული, თუ რომელთან დაკავშირებით არის ძიება დაწყებული. ამას გარდა, იმის გასარკვევადაც ვარ აქ, პოლიციელმა რატომ აიღო თავის თავზე ინიციატივა და დაემუქრა აქციის მონაწილეებს, რომ ისინი ხულიგნობის გამო უნდა დაიჭიროს”, – აღნიშნა სარალიძემ.
მისივე თქმით, აღნიშნული პირი დაკავებით ირმა სიმონიშვილსა და ნუგზარ კუჭაშვილსაც დაემუქრა, რომლებიც მისი საქმის ძირითადი მოწმეები არიან.
