„ნაციონალური მოძრაობის“ წევრის, ზაალ უდუმაშვილის განცხადებით, „ნაციონალური მოძრაობა“ თბილისში საკუთარ კანდიდატს ორ ოლქში აყენებს და შესაბამისად, დანარჩენ ექვს ოლქთან დაკავშირებით მსჯელობა სხვა პარტიებში მიმდინარეობს.
„ორი კვოტა არის „ნაციონალური მოძრაობის“, დედაქალაქში. დანარჩენ ექვს ოლქზე უკვე დანარჩები პარტიები მსჯელობენ და იმედია, რომ მალე მივლენ საბოლოო გადაწყვეტილებამდე და გამოცხადდება რვავე ოლქში ერთიანი კანდიდატი, ჩვენც ველოდებით ამ კონსულტაციების დასრულებას“,- განაცხადა ზაალ უდუმაშვილმა.
კითხვაზე, თუ ოპოზიცია საერთო კანდიდატებზე ვერ შეთანხმდა, დააყენებს თუ არა „ნაციონალური მოძრაობა“ მაჟორიტარ კანდიდატს ყველა ოლქში, უდუმაშვილმა უპასუხა, რომ თუ შეთანხმება ვერ შედგა, არა მხოლოდ „ნაციონალურ მოძრაობას“, ამის გაკეთება სხვა პარტიებსაც მოუწევთ.
„თუ შეთანხმება ვერ მოხდა, თუმცა მე იმედი მაქვს, რომ საბოლოო ჯამში შეთანხმება მოხდება, რა თქმა უნდა, მაშინ არა მარტო „ნაციონალურ მოძრაობას“, ყველა პარტიას მოუწევს საკუთარი კანდიდატის დაყენება, თუმცა ამ შემთხვევაში შეთანხმების საგანი შეიძლება საერთოდ სხვა რამ გახდეს. მაგალითად ის, რომ ერთმანეთს არ დავუყენებთ კანდიდატებს, კვლავ ძალაში რჩება საერთო სიასთან დაკავშირებით, ბევრი საკითხია, რაზეც ოპოზიცია აუცილებლად მიაღწევს შეთანხმებას, თუმცა, რა თქნა უნდა, პირველ ყოვლისა დღეს მთავარია ერთიან კანდიდატებზე შეთანხმება“,- განაცხადა უდუმაშვილმა, რომელიც მიიჩნევს, რომ ოპოზიცია აუცილებლად ერთიანი იქნება.
