Yahoo ამერიკული კომპანიაა, რომელიც ინტერნეტის საძიებო სისტემაში პოპულარობით მეორე ადგილზეა. 2014 წლის შემოდგომით რუსეთში მდებარე კომპიუტერებიდან მასზე თავდასხმა მოხდა, თუმცა, ჯერჯერობით დაუდგენელია, არის თუ არა ეს დაკავშირებული Yahoo-დან ინფორმაციის მასობრივ გაჟონვასთან, რომელიც დღეს გახდა ცნობილი – 24 სექტემბერს The Wall Street Journal-ი წერს გამოძიების ანონიმურ წყაროზე დაყრდნობით.
22 სექტემბერს კომპანია Yahoo-მ გატეხვის შესახებ გაავრცელა ინფორმაცია, რომლის შედეგადაც 500 მილიონი მომხმარებლის მონაცემები მოიპარეს. ამასთანავე, დირექციამ აღნიშნა, რომ მონაცემები მოიპარეს პირებმა, რომლებიც “მთავრობის დაფინანსებით მოქმედებდნენ”.
The Wall Street Journal-ის წყარო ამბობს, რომ კომპანიაზე ჰაკერული თავდასხმა შემთხვევიდან რამდენიმე კვირაში გახდა ცნობილი. Yahoo-ს ხელმძღვანელობა მივიდა დასკვნამდე, რომ შეტევის უკან რუსეთი დგას, რადგანაც ის რუსეთში მდებარე კომპიუტერებიდან განხორციელდა, ჰაკერებს კი კონკრეტულად 30-40 მომხმარებელი აინტერესებდათ, რომელთაც რუსეთში აქვთ ბიზნესი.
Yahoo-დან მონაცემების მასობრივი გატაცების ფაქტს აშშ-ს გამოძიების ფედერალური ბიურო იძიებს – The Wall Street Journal-ი წერს.