ირანის მიერ ჰორმუზის სრუტეზე თავდასხმების გაძლიერების ფონზე, პენტაგონი ახლო აღმოსავლეთში დამატებით საზღვაო ქვეითებსა და სამხედრო ხომალდებს გზავნის.
ამის შესახებ ინფორმაციას The Wall Street Journal-ი ანონიმურ წყაროებზე დაყრდნობით ავრცელებს.
გამოცემის ცნობით, პიტ ჰეგსეთმა დაამტკიცა აშშ-ის ცენტრალური სარდლობის თხოვნა, მიეღოთ დამატებითი საზღვაო მზადყოფნის ჯგუფი, თავისი საზღვაო ქვეითთა საექსპედიციო ქვედანაყოფით. წყაროების თქმით, მსგავსი ჯგუფები რამდენიმე საბრძოლო ხომალდსა და 5 000 საზღვაო ქვეითს მოიცავს.
ანონიმური წყაროები WSJ-ს უყვებიან, რომ იაპონიაში ბაზირებული ხომალდი USS Tripoli და მასთან დაკავშირებული საზღვაო ქვეითები ახლა ახლო აღმოსავლეთისკენ მიემართებიან.
მათივე თქმით, ახლო აღმოსავლეთში მყოფი საზღვაო ქვეითები უკვე მონაწილეობენ ირანის წინააღმდეგ წარმოებულ ოპერაციებში.
