საპარლამენტო უმრავლესობის დეპუტატი ირაკლი ზარქუა ოპოზიციონერ კოლეგებს, რომლებიც მე-11 მოწვევის პარლამენტში მოხვდებიან, მოუწოდებს, დეპუტატებისთვის ხელფასის გაზრდის შესახებ კანონპროექტის წინააღმდეგ წასვლის შემთხვევაში, დაწერონ განცხადება, რომ მომატებულ ხელფასებს არ მიიღებენ. ამის შესახებ ზარქუამ საფინანსო-საბიუჯეტო კომიტეტის სხდომაზე განაცხადა, სადაც პარლამენტის თავმჯდომარემ და დეპუტატებისთვის ხელფასების მომატების შესახებ კანონპროექტის ინიციატორმა, შალვა პაპუაშვილმა კანონმდებლებს დოკუმენტი გააცნო.
„ჩვენ რომ გვყავს პარლამენტში და პარლამენტს მიღმა მავნებლები და ხელმოცარულები, მათთვის შემოთავაზება მაქვს… 2011-2012 წელს, მათი მმართველობის დროს, მათ ფიქსირებული ხელფასი ჰქონდათ და კიდევ ემატებოდათ პრემია-დანამატები. დეპუტატებისთვის ხელფასების მომატება არ ეხება ჩვენს ახლანდელ, მე-10 მოწვევის პარლამენტს. ეს ეხება მომავალ საპარლამენტო არჩევნებში ვინც გაიმარჯვებს, რომელი პარტიებიც შევლენ პარლამენტში მათ, მათ ხელფასზეა საუბარი. მე მაქვს ხელმოცარულებისთვის შემოთავაზება, რომლებიც ახლა ცდილობენ, რომ ეს თემა გაიტანონ ინტერპრეტაციებით, ვიწროპარტიული ინტერესები მოარგონ და ქულები დაიწერონ. არ აქვს მნიშვნელობა, ვიქნები თუ არა მომავალ პარლამენტში. სადაც არ უნდა ვიყო… ყველას მოვუწოდებ, ვინც ოპოზიციიდან ამის წინააღმდეგ გაილაშქრებს, შემდეგ პარლამენტში თუ მოხვდებიან, დაწერონ განცხადება და მომატებულ ხელფასზე უარი თქვან. არავის მივცემთ საშუალებას, რომ ამაზე ქულები დაიწერონ. ჩვენ გავიარეთ ეს ეტაპი – „ხელფასს არ ავიღებთ“, „არ შემოვალთ“, შემდეგ რომ გვთხოვდა განცხადებას და სასამართლოში რომ გვიჩიოდა, მაგალითად, შალიკო „ჩემი ხელფასი დამიბრუნეთო“… მანამდე ამბობდა, ყეყეჩობდა, არ მინდა მაგათი ხელფასიო. ასეთი ორპირი, ორმაგი სტანდარტის პოლიტიკოსებით სავსეა, სამწუხაროდ, ჩვენი ოპოზიცია. ყველას არ ვეხები, უმრავლესობა“, – განაცხადა ზარქუამ.
