ვაშაძე “შერიგებაზე” – გეგონება, ქვიშის ორმოში ბავშვები თამაშობენ, ფორმები ვერ გაიყვეს, ერთმანეთს დასცხეს და ახლა დედებმა უნდა შეარიგონ

კატეგორიულად არ მომწონს სულელური სიტყვა – შერიგება, გეგონება, ქვიშის ორმოში ბავშვები თამაშობენ, ფორმები ვერ გაიყვეს, ერთმანეთს დასცხეს და ახლა დედებმა უნდა შეარიგონ, – ამის შესახებ საქართველოს პირველ არხს ოპოზიციონერმა დეპუტატმა, გრიგოლ ვაშაძემ განუცხადა.

როგორც გრიგოლ ვაშაძემ აღნიშნა, შემოიტანოს ხელისუფლებამ საკონსტიტუციო ცვლილებები ზუსტად ისე, როგორც შეთანხმებული იყო შარლ მიშელის დოკუმენტით და ოპოზიცია პარლამენტში იმ წუთასვე დაბრუნდება.

„ღრმად ვარ დარწმუნებული, რომ ჩემი პოზიცია საქართველოს მოქალაქეების სულ მცირე 90 პროცენტის მოსაზრებას ემთხვევა. კატეგორიულად არ მომწონს, სულელური სიტყვა – შერიგება. გეგონება, ქვიშის ორმოში ბავშვები თამაშობენ, ფორმები ვერ გაიყვეს, ერთმანეთს დასცხეს და ახლა დედებმა უნდა შეარიგონ. რა შერიგება, რის შერიგება? – მარტივია, ჩვენ ცხოვრება უნდა დავიწყოთ კონსტიტუციისა და კანონმდებლობის შესაბამისად, წერტილი. თუ ცხოვრებას კონსტიტუციისა და კანონმდებლობის შესაბამისად დავიწყებთ, ყველაფერი გასაგები იქნება. ასე მთელი სახელმწიფო არ ცხოვრობს. ყველაზე დიდი პასუხისმგებლობა ზუსტად ხელისუფლებას აქვს. რა თქმა უნდა, ოპოზიციასაც. შარლ მიშელის დოკუმენტი აიღეთ და ნახავთ. ისეთი კარგია დამოუკიდებელ დეპუტატად ყოფნა, როცა პარტიული მესიჯბოქსი კისერზე აღარ გაწევს და შეგიძლია, სიმართლეზე სიმართლე ილაპარაკო. შემოიტანონ საკონსტიტუციო ცვლილებები ზუსტად ისე, როგორც შეთანხმებული იყო შარლ მიშელის დოკუმენტით და ოპოზიცია პარლამენტში იმ წუთასვე დაბრუნდება. ამას ოქსფორდის განათლება რად უნდა?“, – განაცხადა გრიგოლ ვაშაძემ.

წინა სტატიაშიგამყრელიძე „ომიკრონზე“- ალბათ გამოჩნდება, ვირუსს საზღვრები ვერ იჭერს
შემდეგი სტატიაპაპუაშვილი – „ნაციონალურ მოძრაობას“ კონფლიქტი აქვს არა „ქართულ ოცნებასთან“, არამედ ქართველ ხალხთან