საქართველოს პრეზიდენტის საპარლამენტო მდივნის ანა დოლიძის განცხადებით დღეს პარლამენტში დეპუტატებმა უზენაესის სასამართლოს მოსამართლეები უნდა აირჩიონ.
როგორც ანა დოლიძემ ჟურნალისტებთან საუბრისას აღნიშნა, სამწუხაროდ კანდიდატებს პარლამენტში უკვე მეექვსედ უწევთ მისვლა, თუმცა მათი არჩევა ქვორუმის პრობლემის გამო ვერ ხერხდება.
,,როგორც კანონი მოითხოვს, ჩვენ უკვე მეექვსედ გამოვცხადდით პარლამენტში იმისათვის, რომ საკანონმდებლო ორგანომ კენჭი უყაროს უზენაესი სასამართლოს მოსამართლეობის კანიდდატებს. შეგახსენებთ, რომ საქართველოს პარლამენტის ყველა წევრის, როგორც უმრავლესობის, ისე უმცირესობის კანონიერი მოვალეობაა ბრძანდებოდნენ აქ. ასევე მათი ვალდებულებაა შეავსონ ის სამი ვაკანსია, რომელიც აგერ უკვე ექვსი თვეა საქართველოს უზენაეს სასამართლოშია, რის გამოც პირდაპირ ზარალდება ის ხალხი, ვისაც სარჩელი აქვს უზენაეს სასამართლოში“,-განაცხადა ანა დოლიძემ.
უზენაესი სასამართლოს მოსამართლის სამ ვაკანტურ თანამდებობაზე ლევან ბოძაშვილის, თამარ ლალიაშვილის ნანა თოდუას კანდიდატურებია წარდგენილი.