ლოკარნოს საერთაშორისო კინოფესტივალზე ქართველი რეჟისორის, უტა ბერიას მხატვრულმა ფილმმა, „ცრემლსადენი გაზი“, დამოუკიდებელი ჟიურის ჯილდო მოიპოვა.
რეჟისორმა მიღებული პრიზი სინდისის პატიმარს, მათე დევიძეს მიუძღვნა. უტა ბერიამ ჯილდოს გადაცემისას სიტყვით გამოსვლისას აღნიშნა:
„მინდა ეს პრიზი მივუძღვნა მათე დევიძეს, რომელიც ყველაზე ახალგაზრდა პოლიტიკური პატიმარია საქართველოში. ის მონაწილეობდა იმ პროტესტში, სადაც ეს ფილმი გადავიღეთ. ის იბრძოდა ჩვენი ქვეყნის თავისუფლებისა და უკეთესი მომავლისთვის. ეს მათეს ეძღვნება“.
სურათის გარკვეული ნაწილი უშუალოდ თბილისში მიმდინარე საპროტესტო აქციების დროს არის გადაღებული. სიუჟეტის ცენტრში 16 წლის ელენე და მისი ოჯახია, რომლებიც სამოქალაქო პროტესტის ეპიცენტრში აღმოჩნდებიან. თავისუფლებისთვის საყოველთაო ბრძოლის პარალელურად, მთავარ გმირს საკუთარი ოჯახის დაშლის მიზეზებთან თვალის გასწორება მოუწევს.
