უკრაინულმა სახმელეთო რობოტებმა ორ ღამეში 30 კილომეტრის სიგრძის მარშრუტები დანაკარგის გარეშე გაწმინდეს – ამის შესახებ გამოცემა Militarnyi იუწყება.
მესამე საარმიო კორპუსმა გამოცემას განუცხადა, რომ უპილოტო სახმელეთო სისტემებმა განაღმვის რთული დავალება სრულად დამოუკიდებლად შეასრულეს. კორპუსის შეფასებით, ორ მესანგრეთა ასეულს იმავე სამუშაოს შესასრულებლად დაახლოებით ერთი კვირა დასჭირდებოდა, მაშინ როცა რობოტული სისტემების გამოყენებამ მესანგრეების დანაკარგები თავიდან აიცილა.
„მოიერიშე ოპერაციების დროს, უპილოტო საფრენი აპარატები და სახმელეთო რობოტული სისტემები ყოველთვის ქვეითებზე წინ მიდიან“ – განაცხადა მესამე საარმიო კორპუსის მეთაურმა, ბრიგადის გენერალმა ანდრიი ბილეცკიმ.
Militarnyi-ის ინფორმაციით, კორპუსის პასუხისმგებლობის ზონაში რობოტული სისტემები ამჟამად ქვეითსაწინააღმდეგო ნაღმების დაახლოებით 60%-ს აუვნებელყოფენ, პლატფორმები ასევე მხარს უჭერენ მოიერიშე ოპერაციებს და ფრონტის ზოგიერთ ყველაზე საშიშ მონაკვეთზე სამხედრო მოსამსახურეებს ანაცვლებენ.
Militarnyi-ის ცნობით, კორპუსი ამ სისტემებს სხვა ამოცანებისთვისაც იყენებს, როგორებიცაა: რუსული ძალების წინსვლისთვის გამოყენებული მარშრუტების დისტანციური დანაღმვა (ერთ ეკიპაჟს შეუძლია დღეში 200 მეტრამდე რელიეფის დანაღმვა); ფრონტის ხაზის ლოგისტიკა, მათ შორის დაჭრილი ჯარისკაცების ევაკუაცია, სურსათის, სამშენებლო მასალებისა და სხვა აღჭურვილობის მიწოდება.
