უკრაინის უსაფრთხოების სამსახურმა (SSU) დრონების გამოყენებით წარმატებული სამხედრო ოპერაცია განახორციელა დროებით ოკუპირებულ ყირიმში მდებარე ორ საკვანძო რუსულ ავიაბაზაზე — „საკისა“ და „გვარდეისკოეზე“. ამის შესახებ ინფორმაციას სააგენტო „უკრინფორმი“ ავრცელებს.
უწყების ცნობით, „საკის“ სამხედრო აეროდრომისთვის ეს უკვე მეორე დადასტურებული დარტყმაა ბოლო ერთი კვირის განმავლობაში. უკრაინულმა უპილოტო საფრენმა აპარატებმა სამხედრო ტექნიკის შესანახ შვიდ ანგარს დაარტყეს, სადაც რუსული გამანადგურებლები და საფრონტო ბომბდამშენები (Su-30SM, Su-30 და Su-24) იყო განთავსებული. პირველადი შეფასებით, განადგურებული ან სერიოზულად დაზიანებულია სულ მცირე შვიდი სამხედრო თვითმფრინავი.
რაც შეეხება „გვარდეისკოს“ ავიაბაზას, იერიშის შედეგად დარტყმა განხორციელდა ორ ანგარზე, სადაც, არსებული ინფორმაციით, რუსული საავიაციო ტექნიკა და „შაჰედის“ ტიპის თავდამსხმელი დრონები ინახებოდა.
„ეს დარტყმები არის ნაწილი მიმდინარე 40-დღიანი სამხედრო კამპანიისა, რომელიც რუსეთზე მზარდი ზეწოლის განხორციელებას ისახავს მიზნად“, — აცხადებენ უკრაინის უსაფრთხოების სამსახურში.
უკრაინული მხარის განმარტებით, აღნიშნული ორი ბაზა რუსეთის საოკუპაციო ძალების უმნიშვნელოვანესი საავიაციო პუნქტებია ყირიმში. იქ ბაზირებული ტაქტიკური ავიაცია რეგულარულად ახორციელებს სარაკეტო და საჰაერო დაბომბვებს უკრაინის ტერიტორიაზე და მხარს უჭერს რუსეთის სამხედრო ოპერაციებს სამხრეთის ფრონტზე.
