უკრაინის პრეზიდენტის ვოლოდიმირ ზელენსკის განცხადებით, შეიარაღებული ძალების მთავარსარდალმა ალექსანდრე სირსკიმ ამცნო, რომ რუსეთის კურსკის ოლქში უკრაინულმა ძალებმა პოზიციები გაიმყარეს.
„დღეს ხდება ჩვენი სახელმწიფოს გაცვლითი ფონდის შევსება. მადლობა ყველა სამხედროს და მეთაურს, რომლებსაც რუსი სამხედროები ტყვედ აჰყავთ და ამით, აახლოებენ ჩვენი სამხედროების და სამოქალაქო პირების გათავისუფლებას რუსეთის ტყვეობიდან“, – განაცხადა ზელენსკიმ.
მისივე თქმით, გენერალ სირსკის მოხსენება აგრეთვე ეხებოდა უკრაინის ფრონტის ხაზზე, ტორეცკის და პოკროვსკის მიმართულებებზე არსებულ ვითარებას.
„ჩვენს პოზიციებზე ყოველდღიურად, ათობით თავდასხმა ხდება, მაგრამ ჩვენი ჯარისკაცები და დანაყოფები ყველაფერს აკეთებენ იმისთვის, რომ გაანადგურონ ოკუპანტები და მოიგერიონ თავდასხმები. სიტუაცია კონტროლს ექვემდებარება.
მთავარია რუსეთის შეტევითი პოტენციალის შეზღუდვა და ჩვენი შესაძლებლობების დიაპაზონი. უკრაინელი დიპლომატებისთვის შესაბამის მითითებებს ვამზადებთ“, – ამბობს ზელენსკი.
შეგახსენებთ, უკრაინული ძალები რუსეთის კურსკის ოლქში ოპერაციას 6 აგვისტოს შემდეგ აწარმოებენ.
