უკრაინის მიერ ნავთობგადამამუშავებელ ქარხნებზე მიტანილი იერიშების გამო რუსეთში ბენზინის დეფიციტი დაიწყო. ინფორმაციას The Moscow Times პროსამთავრობო გამოცემა Kommersant-ის მონაცემებზე დაყრდნობით ავრცელებს.
მათი ინფორმაციით, 8 მაისს მომწოდებლებმა ბირჟაზე 32 640 ტონა ბენზინი გაყიდეს, რაც წინა დღესთან შედარებით 5,9%-ით ნაკლებია. A-92 მარკის ბენზინის გაყიდვები 8,9%-ით შემცირდა (20 340 ტონამდე). A-95 მარკის გაყიდვები მცირედით, 1,5%-ით გაიზარდა (12 240 ტონამდე). ამავდროულად, დაუკმაყოფილებელმა მოთხოვნამ A-92-ზე 23 460 ტონას მიაღწია, ხოლო A-95-ზე – 26 340 ტონას.
მოხმარების პიკური სეზონის წინ ბაზარზე A-95 მარკის ბენზინის დეფიციტი უკვე აშკარაა. როგორც წესი, ზაფხულში ამ მარკის საწვავზე მოთხოვნა უფრო სწრაფად იზრდება, რადგან საკურორტო სეზონზე მომხმარებლები მეტად იყენებენ მსუბუქ ავტომობილებს, რომლებიც სწორედ A-95-ზეა გათვლილი.
დეფიციტი გამოწვეულია მსხვილ ქარხნებში ჩატარებული „დაუგეგმავი რემონტით“ და ნავთობპროდუქტების წარმოების შემცირებით. რემონტი შესაძლოა ერთ თვეზე მეტხანს გაგრძელდეს. მაისის დასაწყისში მიწოდების ვადები საშუალოდ 2-4 კვირით გაიზარდა. ეს ვითარება ბაზრის მონაწილეებს უზღუდავს საკმარისი მარაგების შექმნის შესაძლებლობას, რაც ზრდის ზაფხულში საწვავის კრიზისის რისკს.
