უკრაინის გენერალურმა პროკურატურამ პრეზიდენტის ოფისისგან მიიღო მოთხოვნა, რომ ბელარუსის პრეზიდენტის, ალექსანდრ ლუკაშენკოს წინააღმდეგ სისხლის სამართლის საქმის აღძვრა განიხილონ.
უწყების ცნობით, განცხადება ოფიციალურად ჩაიბარეს, თუმცა გამოძიება ჯერჯერობით არ დაწყებულა.
„მოთხოვნა ამჟამად განხილვის პროცესშია. მისი დამუშავების შემდეგ განმცხადებლებს კანონით დადგენილი წესით ეცნობებათ“, — განაცხადეს გენერალური პროკურატურის საინფორმაციო პოლიტიკისა და კომუნიკაციების დეპარტამენტში.
პრეზიდენტის ადმინისტრაციას ლუკაშენკოს წინააღმდეგ გამოძიების დაწყების თხოვნით ოპოზიციამ მას შემდეგ მიმართა, რაც მას რუსეთისთვის უკრაინის წინააღმდეგ ომში დახმარებაში დასდეს ბრალი.
