დნეპროპეტროვსკის ოლქის სინელნიკოვოსა და ნიკოპოლის რაიონების ორი დასახლებული პუნქტიდან 6 500-ზე მეტი ადამიანის სავალდებულო ევაკუაცია იგეგმება.
„უკრინფორმის“ ცნობით, ამის შესახებ დნეპროპეტროვსკის საოლქო-სამხედრო ადმინისტრაციის ხელმძღვანელმა, ალექსანდრ განჟამ „ტელეგრამში“ განაცხადა.
„ოლქის კიდევ ორი დასახლებული პუნქტის — სინელნიკოვოს რაიონის ვასილკოვკისა და ნიკოპოლის რაიონის ვიშჩეტარასოვკის ყველა მცხოვრებლისთვის სავალდებულო ევაკუაცია გამოცხადდა. ბავშვების ევაკუაცია იქიდან მანამდეც განხორციელდა, ახლა კი საფრთხის შემცველი ზონები ზრდასრულებმაც უნდა დატოვონ. იქ ამ დროისთვის 6 500-ზე მეტი ადამიანი რჩება“, — განაცხადა მან.
დნეპროპეტროვსკის საოლქო-სამხედრო ადმინისტრაციის ხელმძღვანელის თქმით, ევაკუირებულთა მისაღებად ოლქში ხუთი ტრანზიტული ცენტრი მოეწყო. იქ მოქალაქეები მიიღებენ ფინანსურ, სამართლებრივ, ფსიქოლოგიურ და სამედიცინო დახმარებას, ასევე უზრუნველყოფილნი იქნებიან საკვებითა და ჰიგიენური საშუალებებით.
