უკრაინაში დაღუპული კიდევ ერთი ქართველი მებრძოლი, გიორგი გრიგოლია გამთენიისას სამშობლოში ჩამოასვენეს. მას ზუგდიდში ხვალ დაკრძალავენ.
სამშობლოში გადმოსვენებამდე სამოქალაქო პანაშვიდი უკრაინის ერთ-ერთ ტაძარში გაიმართა.
გიორგი გრიგოლია დონეცკის ოლქში, ბახმუტის მიმდებარედ იბრძოდა. იგი ოჯახთან ერთად უკრაინაში ცხოვრობდა და რუსული აგრესიის წინააღმდეგ საბრძოლო მოქმედებებში ომის დაწყებისთანავე ჩაერთო.
“როცა ომი დაიწყო, მაშინვე ჩაეწერა იქ მოხალისედ და იბრძოდა პირველივე წუთიდან. არცერთი წამით უკან არ დაუხევია. მე მქონდა რამდენიმე უკრაინელ მებრძოლთან კონტაქტი მისი გარდაცვალების შემდეგ და ყველა მეუბნებოდა, რომ ბიძაჩემი იყო გმირი და იბრძოდა საქართველოსა და უკრაინის მხარდამხარ”, – ამბობს გარდაცვლილის ნათესავი, ქეთევან სიგუა.
