რუსული დამოუკიდებელი საგამოძიებო მედიაგამოცემა Агентство ინფორმაციას ავრცელებს, რომ უკრაინამ რუსეთის წინააღმდეგ „ფლამინგოს“ რაკეტების გამოყენება თითქმის გააორმაგა.
მედიაგამოცემა წერს, რომ ივნისიდან რუსეთის თავდაცვის სამინისტრომ განაცხადა, რომ სულ მცირე 57 „ფლამინგოს“ რაკეტა მოიგერია, მაშინ როცა თებერვლიდან მაისამდე 31 რაკეტის შესახებ იუწყებოდა. მათივე ცნობით, მხოლოდ ბოლო ორი კვირის განმავლობაში რუსეთის უწყებამ 25 ჩამოგდებული რაკეტის შესახებ გაავრცელა ინფორმაცია
გამოცემა წერს, რომ ზაფხულში დადასტურდა „ფლამინგოს“ სულ მცირე ოთხი წარმატებული დარტყმა რუსეთის საწარმოებზე ჩებოქსარში, ვოლგოგრადში, კიროვსა და სამარაში.
უკრაინა რეალურად გაშვებული რაკეტების რაოდენობას არ ასაჯაროებს. ასევე, სამხედრო ანალიტიკოსები ვარაუდობენ, რომ დარტყმების ინტენსივობის ზრდა შესაძლოა ამ რაკეტების წარმოების გაფართოებას უკავშირდებოდეს.
