წულუკიანის კომისიაზე გამოუცხადებლობის ფაქტზე ბრალდებული ნიკა მელიასა და გივი თარგამაძის საქმეებზე განაჩენი დღეს, 27 ივნისს გამოცხადდება.
თარგამაძის სასამართლო პროცესი საქალაქო სასამართლოში 10:30 საათზეა ჩანიშნული და როგორც ცნობილია, თავად თარგამაძე განაჩენის გამოტანას არ დაესწრება.
რაც შეეხება ნიკა მელიას, მისი სასამართლო 13:30 საათზეა ჩანიშნული. ის უკვე იმყოფება წინასწარ პატიმრობაში. წულუკიანის კომისიაზე გამოუცხადებლობისთვის, მას თავდაპირველად 50 000-ლარიანი გირაო ჰქონდა შეფარდებული, თუმცა მისი გადაუხდელობის გამო, ის მოგვიანებით პატიმრობით შეიცვალა. აღკვეთის ღონისძიების გადახედვის საკითხზე სასამართლოს 30 მაისს უნდა ემსჯელა, თუმცა მელია სასამართლოს წინა დღეს, 29 მაისს დააკავეს.
