ოთხშაბათს მომხდარი ორი ძლიერი მიწისძვრის შემდეგ დაწყებული ხშირი განმეორებითი ბიძგები ჩამონგრეულ შენობებში მოყოლილი ადამიანების სამაშველო სამუშაოებს საგრძნობლად აფერხებს. ამის შესახებ „წითელი ჯვრის“ ამერიკის მიმართულების დირექტორმა და ჰუმანიტარული მისიის კოორდინატორმა, ლოის პეისმა CNN-თან ინტერვიუში განაცხადა.
მისი თქმით, საფრთხე მუდმივია და მიწისქვეშა ბიძგები მაშინაც კი იგრძნობა, როდესაც ის ადგილზე მყოფ გუნდებთან სატელეფონო კავშირზეა. ეს კი მაშველებს აიძულებს, დაზარალებულ დასახლებებში შესვლისას უკიდურესი სიფრთხილე გამოიჩინონ.
„ხალხს სახლში დაბრუნება და თავის უსაფრთხოდ იგრძნობა სურს, თუმცა ინფრასტრუქტურა არამყარია — შენობები პირდაპირი მნიშვნელობით იშლება, ამიტომ მომავალ კვირებში ძალიან ფრთხილად უნდა ვიყოთ“, — აღნიშნა პეისმა.
მუდმივი საფრთხის გამო მოსახლეობის დიდი ნაწილი ღამეს კვლავ ღია ცის ქვეშ ათევს. მიუხედავად იმისა, რომ დროებითი თავშესაფრები შენდება, ყველას დაბინავებას გარკვეული დრო დასჭირდება.
პეისმა ასევე ხაზი გაუსვა საზოგადოებასა და მოხალისეებში არსებულ დიდ შფოთვას. მისი თქმით, „წითელი ჯვრის“ ზოგიერთ მოხალისეს თავად ჰყავს დაკარგული ოჯახის წევრები ან დაკარგა სახლი, თუმცა დაზარალებულების დასახმარებლად მუშაობა დაუყოვნებლივ დაიწყეს. ის იმედოვნებს, რომ საერთაშორისო ჯგუფების ჩასვლის შემდეგ, ადგილობრივი მოხალისეების ჩანაცვლება და მათთვის დასვენების საშუალების მიცემა მოხერხდება.
