უკრაინის დელეგაცია ჟენევაში გაემგზავრა, სადაც 17–18 თებერვალს უკრაინის, აშშ-ისა და რუსეთის მონაწილეობით მოლაპარაკებების ახალი რაუნდი უნდა გაიმართოს. ინფორმაცია პრეზიდენტის ოფისის ხელმძღვანელმა კირილ ბუდანოვმა გაავრცელა.
„ჟენევის გზაზე. წინ მოლაპარაკებების მორიგი რაუნდია… უკრაინის ინტერესები დაცული უნდა იყოს“, – დაწერა ბუდანოვმა.
ТАСС-ის ცნობით, შეხვედრაზე შესაძლოა ენერგეტიკული ზავის საკითხი განიხილონ. სააგენტო ასევე იუწყება, რომ შვეიცარია რუსეთის დელეგაციის უსაფრთხო გადაფრენას უზრუნველყოფს.
რუსეთის დელეგაციას ვლადიმირ მედინსკი უხელმძღვანელებს, შემადგენლობაში კი მიხეილ გალუზინიც იქნება.
Reuters-ის ინფორმაციით, აშშ-ის წარმომადგენლები სტივ ვიტკოფი და ჯარედ კუშნერი 17 თებერვალს ჟენევაში ჯერ ირანულ მხარეს შეხვდებიან, შემდეგ კი სამმხრივ მოლაპარაკებებში ჩაერთვებიან.
აშშ-ის ყოფილი ელჩი რუსეთში მაიკლ მაკფოლი მიიჩნევს, რომ მედინსკის დაბრუნება მოლაპარაკებების პროცესში კრემლის რეალურ განწყობაზე კითხვებს აჩენს.
