წალენჯიხის მუნიციპალიტეტის ჯგალის ადმინისტრაციულ ერთეულში იუსტიციის სახლი გაიხსნა

იუსტიციის მინისტრმა თეა წულუკიანმა 31 დეკემბერს სოფელ ჯგალის და მიმდებარე სოფლების მოსახლეობას 2018 წლის დადგომა საზოგადოებრივი ცენტრის საზეიმო გახსნით მიულოცა.

51-ე საზოგადოებრივი ცენტრი იუსტიციის მინისტრმა თეა წულუკიანმა შვილთან – მერიკო კაკულიასთან ერთად წალენჯიხის მუნიციპალიტეტის სოფელ ჯგალში გაიხსნა. საზეიმო ღონისძიებას მოწვეული სტუმრები, ადგილობრივი მოსახლეობა და ახლომდებარე სოფლების მცხოვრებნი ესწრებოდნენ.
ცენტრში ხუთი ადგილობრივი მცხოვრები დასაქმდა. ჯგალის საზოგადოებრივი ცენტრი ამ სოფლის მკვიდრ 3 ათასამდე მომხმარებელს და მიმდებარე სოფლების − საჩინოს, მედანის, მიქავასა და მუხურის − 7 ათასამდე მცხოვრებს მოემსახურება.

საზოგადოებრივი ცენტრის გახსნა სტუმრებისათვის ნამდვილ დღესასწაულად გადაიქცა. ჯგალის ცენტრი საახალწლო დეკორაციებით, ნაძვის ხით და სპეციალური საახალწლო გირლანდებით მოირთო; ზუსტად 2018 წლის 00:00 საათზე კი, სოფელში გრანდიოზული ფოიერვერკი მოეწყო. ღონისძიების ოფიციალური ნაწილის დასრულების შემდეგ საზეიმო კონცერტი გაიმართა.

ჯგალის საზოგადოებრივი ცენტრის პირველი ვიზიტორები თეა ძიძარია და ზვიად ჩანგელია იყვნენ, რომლებმაც ახალი წლის დადგომამდე თავიანთი ქორწინება იურიდიულად დაამოწმეს. ხელმოწერის ცერემონიალს იუსტიციის მინისტრი თეა წულუკიანი დაესწრო.
საზოგადოებრივი ცენტრის გახსნით ჯგალის და მიმდებარე სოფლების მცხოვრებთათვის ხელმისაწვდომი გახდა არა მხოლოდ საჯარო სერვისები, არამედ „მაგთისა“ და „ლიბერთი ბანკის“ მომსახურებაც, რაც პენსიონერებს − პენსიის სოფლიდან გაუსვლელად მიღების, ახალგაზრდებს კი, უკაბელო ინტერნეტით უფასოდ სარგებლობის საშუალებას მისცემს.

საზოგადოებრივი ცენტრი საჯარო და კერძო სექტორის წარმატებული თანამშრომლობის საუკეთესო მაგალითია, რომელიც მნიშვნელოვნად ზოგავს ადგილობრივთა დროსა და ფინანსებს. სოფლისა და დაბების მოსახლეობას ის სახელმწიფო და კერძო სექტორის 200-ზე მეტ სერვისს სთავაზობს. იუსტიციის სამინისტროს საზოგადოებრივი ცენტრების მთავარი მახასიათებელი ადგილობრივთა საჭიროებებზე ორიენტაციაა. საზოგადოებრივი ცენტრები მომხმარებელს მრავალფეროვან სერვისს, გამარტივებულ პროცედურებს, საინფორმაციო ტექნოლოგიებთან წვდომასა და თანამედროვე ინფრასტრუქტურას სთავაზობენ. ჯგალის საზოგადოებრივი ცენტრის გახსნით მოსახლეობისთვის ხელმისაწვდომი გახდა იუსტიციის სახლის სერვისების, სოფლის მეურნეობის სამინისტროს მომსახურებების, განათლებისა და მეცნიერების სამინისტროს სერვისების (მაგალითად, სასკოლო ატესტატის) ადგილზე მიღება.
საქართველოს მასშტაბით ცენტრები ფუნქციონირებს ათ რეგიონსა და 37 მუნიციპალიტეტში. საქართველოს სხვადასხვა რეგიონში მოქმედ 50 საზოგადოებრივ ცენტრში ამ დრომდე 500 000-მდე სერვისი გაიცა, 2 000-მდე ღონისძიება ჩატარდა და 460 ადამიანი დასაქმდა.

ჯგალის გარდა, დღეისათვის უკვე ფუნქციონირებს 50 საზოგადოებრივი ცენტრი: ზეინდარში, შაშიანში, სართიჭალაში, გომში, რუისში, ჭალადიდში, ხევში, მანგლისში, კოდაში, ფოკაში, ნიგოითში, ჯვარში, შორაპანში, ყვარელწყალში, მუხაესტატეში, გეგუთში, მეჯვრისხევში, კაჭრეთში, ხიდისთავში, ნუკრიანში, კორბოულში, ღორეშაში, კაზრეთში, შილდაში, ორსანტიაში, ქვემო ნატანებში, კაბალში, ლენტეხში, ჩაქვში, ხრეითში, სადახლოში, რუხში, დიდ ჯიხაიშში, მარტყოფში, იორმუღანლოში, არხილოსკალოში, ტყვიავში, ვალეში, ბერძენაულში, უსახელოში, კიცხში, ლაჯანაში, ბარალეთში, კუმურდოში, წალკაში, კოხნარში, ბაკურიანში, თბილისში (გლდანში), მეორე სვირსა და ფასანაურში.

 

[fbvideo link=”https://www.facebook.com/MinistryofJusticeofGeorgia/videos/1487916181256958/” width=”500″ height=”400″ onlyvideo=”1″]

banner
წინა სტატიაშიილია მეორე საქართველოს მოსახლეობას ახალ წელს ულოცავს
შემდეგი სტატიაავტომობილებზე ქონების გადასახადის გადახდა 2018 წლიდან დაიწყება